У артыкуле для The Washington Post генэрал арміі ЗША ў адстаўцы Дэвід Пэтрэўс і дырэктар праекту крытычных пагроз Амэрыканскага інстытуту прадпрымальніцтва Фрэдэрык Каган адзначаюць, што ў апошні час пачасьціліся змрочныя прагнозы адносна контранаступу Ўзброеных Сіл Украіны. Экспэрты падкрэсьліваюць, што вайна ня йдзе лінейна. І хоць расейцы здольныя доўга трымаць абарону, у нейкі момант яе можна раптоўна і хутка пераадолець.
«Украінцы імкнуцца стварыць менавіта такі эфэкт — і ёсьць падставы меркаваць, што яны могуць гэта зрабіць», — адзначаюць Пэтрэўс і Каган.
На іх думку, расейскія войскі, якія знаходзяцца на першай лініі абароны, верагодна, стаміліся або ўжо зьнясіленыя. Бо ратацыі не праводзілі як мінімум з пачатку контранаступу 4 чэрвеня. Акрамя таго, на думку экспэртаў, таксама незразумела, наколькі моцна замінаваныя і ўкамплектаваныя другарадныя рубяжы абароны расейцаў.
«Самае галоўнае, што ў Расеі няма вялікіх апэратыўных рэзэрваў. Гэта азначае, што любы ўкраінскі прарыў існуючых рубяжоў будзе складана хутка закрыць. На гэта Ўкраіна робіць стаўку», — гаворыцца ў артыкуле Washington Post.
ГЛЯДЗІЦЕ ТАКСАМА: «Мы рухаемся наперад па некалькіх напрамках», — Зяленскі пра контранаступУ той жа час Дэвід Пэтрэўс і Фрэдэрык Каган адзначаюць, што расейская армія пераняла гнуткую абарону, пры якой яе войскі спачатку адступаюць, а потым контратакуюць, калі ўзброеныя сілы нясуць страты і пачынаюць стамляцца. Таму, падкрэсьліваюць аўтары, хоць украінскі контранаступ надзвычай складаны, Узброеныя сілы дэманструюць посьпех.
У прыватнасьці, яны наступаюць на двух ключавых напрамках: у раёне Рабоціна ў напрамку Такмаку і Мелітопалю і на поўдзень ад Вялікай Навасёлкі ў напрамку Бярдзянска. Таму вайсковыя экспэрты мяркуюць, што, хутчэй за ўсё, украінцы прарвалі прынамсі першую лінію расейскіх мінных палёў і абарончых умацаваньняў на абодвух участках, і іх наступ у раёне Рабоціну мае шанцы на паскарэньне.
Прабіць сур’ёзную абарону, такую, як расейцы стварылі ва Украіне, — складаная задача для любога войска, пішуць Дэвід Пэтрэўс і Фрэдэрык Каган і адзначаюць, што падобныя апэрацыі праводзілі ЗША ў Іраку, але ў той жа час яны мелі поўнае панаваньне ў паветры, у адрозьненьне ад украінскіх вайскоўцаў.
ГЛЯДЗІЦЕ ТАКСАМА: Украіна вярнула ўжо палову тэрыторыі, захопленай РФ з пачатку ўварваньня, — БлінкенТаму аўтары артыкулу заклікаюць не крытыкаваць контранаступ, а паскорыць забесьпячэньне Ўзброеных Сіл Украіны зьнішчальнікамі F-16, а таксама ракетнымі комплексамі ATACMS і касэтнымі боепрыпасамі.
З гэтымі думкамі пагадзіўся былы камандуючы войскам ЗША ў Эўропе Бэн Годжес.
«Пэнтагон шмат гаворыць пра мультыдамэнныя апэрацыі. Узброеныя Сілы Ўкраіны гэтым сапраўды займаюцца. Наземны штурм — толькі частка контранаступу», — напісаў Годжэс.
New York Times лічыць, што гэтая заява сьведчыць пра зьмену пазыцыі ЗША, якія раней заяўлялі, што далучацца да падрыхтоўкі ўкраінскіх лётнікаў толькі ў выпадку вычарпаньня магчымасьцяў эўрапейскіх партнэраў, а цяпер кажуць, што «робяць усё магчымае», каб паскорыць праграму навучаньня.
ГЛЯДЗІЦЕ ТАКСАМА: Байдэн паабяцаў Украіне ў паскораным парадку выдаваць дазволы іншым дзяржавам на перадачу сваіх F-16Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.