Намесьніца міністра абароны Ўкраіны Ганна Маляр заявіла аб прасоўваньні ўкраінскага войска ў Запароскай вобласьці.
«Нашы падразьдзелы мелі посьпех на паўднёвым усходзе Рабоціна і на поўдзень ад Малой Такмачкі Запароскай вобласьці. Вораг спрабаваў вярнуць страчаныя пазыцыі на ўсходзе Рабоціна, але беспасьпяхова», — паведаміла Ганна Маляр.
Генэральны штаб Узброеных сіл Украіны раніцай 22 жніўня паведаміў, што ўкраінскія падразьдзелы замацоўваюцца ў гэтых кірунках і наносяць артылерыйскія ўдары па расейскіх пазыцыях.
«Сілы абароны Ўкраіны працягваюць вядзеньне наступальнай апэрацыі на бахмуцкім і мелітопальскім кірунках», — адзначаецца ў паведамленьні.
Паводле Генэральнага штабу Ўкраіны, расейцы коштам вялікіх стратаў працягваюць «беспасьпяхова» наступаць у раёнах Аўдзееўкі, Мар’інкі і Новаміхайлаўкі ў Данецкай вобласьці.
Найбольш цяжкі баі цяпер адбываюцца ў Харкаўскай вобласьці на купянскім кірунку.
ГЛЯДЗІЦЕ ТАКСАМА: Зяленскі: Кіеў атрымае 42 зьнішчальнікі F-16 пасьля навучаньня пілётаўУ Расеі заявілі аб «паляпшэньні» пазыцый у Харкаўскай вобласьці
У Міністэрстве абароны Расеі паведамілі, што пры падтрымцы сваёй артылерыі і авіяцыі расейскія падразьдзелы палепшылі «становішча па пярэднім краі», а ў Харкаўскай і Луганскай абласьцях адбілі чатыры атакі ўкраінскага войска.
Расейцы таксама пераконваюць, што ў раёне населенага пункта Рабоціна на Запарожжы адбілі «пяць атак падразьдзелаў 82-й дэсантна-штурмавой брыгады з складу стратэгічнага рэзэрву Ўзброеных сіл Украіны».
Інстытут вывучэньня вайны: вяртаньне населенага пункту Рабоціна дазволіць разарваць «расейскі фронт»
Экспэрты амэрыканскага Інстытуту вывучэньня вайны (ISW) назвалі тактычна важнымі атакі ўкраінцаў каля Рабоціна на Запарожжы.
«Прасоўваньне ўкраінцаў у гэтым раёне можа дазволіць украінскім сілам пачаць дзейнічаць у абыход самых шчыльных расейскіх мінных палёў. Посьпехі Ўкраіны ў гэтым кірунку, хутчэй за ўсё, пацьвярджаюць гэтую ацэнку. Сталае прасоўваньне Ўкраіны ў раёне Рабоціна таксама, імаверна, накіравана на прыніжэньне расейскіх сіл, якія ўклалі значныя намаганьні, рэсурсы і асабовы склад, каб утрымаць пазыцыі вакол Рабоціна», — адзначылі экспэрты ISW у справаздачы ад 21 жніўня.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.