Расейцы нанесьлі ўдары ракетамі Х-22, «Калібр» і найбольш — ракетамі Х-101/Х-555. Іх запускалі з самалётаў, якія падняліся ў неба з аэрадромаў «Сальцы» (Ноўгарадзкая вобласьць) і «Энгельс» у Саратаўскай вобласьці, а таксама з акваторыі Чорнага мора.
Найбольш ахвяр — у Луцку
У Луцку дзьве ракеты трапілі ў прамысловае прадпрыемства. Там цяпер працуюць ратавальнікі і пажарныя.
Кіраўнік Валынскай абласной вайсковай адміністрацыі Юры Пагуляйка паведаміў, што тры асобы загінулі, яшчэ тры атрымалі раненьні.
Пазьней швэдзкі вытворца падшыпнікаў SKF паведаміў, што ў Луцку ад расейскіх абстрэлаў пацярпеў іхны завод і загінулі яго супрацоўнікі.
Агенцтва Reuters са спасылкай на прэсавага сакратара SKF удакладніла, што кампанія будзе вызначаць шкоду, нанесеную расейскім абстрэлам, але найбольшую ўвагу накіруюць на бясьпеку супрацоўнікаў.
Найбуйнейшы ў сьвеце вытворца прамысловых падшыпнікаў мае каля 1100 супрацоўнікаў ва Ўкраіне, большасьць зь якіх працуе на заводзе ў Луцку. На гэтае прадпрыемства ў 2022 годзе прыпадала каля 0,5% ад агульнага аб'ёму вытворчасьці SKF.
ГЛЯДЗІЦЕ ТАКСАМА: Расея абстраляла Херсоншчыну, 7 чалавек загінуліНайбольш разбурэньняў — у Львове
Мэр Львова паведаміў, што ў горадзе атрымалі пашкоджаньні больш як 100 памяшканьняў, ад выбуховых хваляў выбіта больш як 500 шыбаў. Цалкам зьнішчаны дзіцячы садок. Пацярпелі чатыры цывільныя. Ім надалі мэдычную дапамогу, лекары кажуць, што пагрозы іхнаму жыцьцю няма.
Пазьней львоўскія ўлады ўдакладнілі, што колькасьць параненых павялічылася да 19.
У Дніпры пашкоджана прамысловае прадпрыемства і спартовы цэнтар
Пасьля расейскага абстрэлу ў горадзе Дніпро загарэлася прамысловае прадпрыемства. Полымя ахапіла каля 800 квадратных мэтраў.
«Параненыя 2 асобы. 59-гадовая жанчына атрымала лёгкія пашкоджаньні і будзе лячыцца дома, а 70-гадовага мужчыну шпіталізавалі, ён у стане сярэдняй цяжкасьці», — паведамілі абласныя ўлады.
Апроч таго, разбураны мясцовы спартовы цэнтар, дзе трэніраваліся ўкраінскія спартоўцы і дзеці, а таксама праходзілі ўсеўкраінскія спаборніцтвы.
Ракеты зьбівалі і над Івана-Франкоўскай вобласьцю. Там у выніку падзеньня рэшткаў ракет пашкоджаньні атрымаў адзін прыватны будынак. Абышлося без ахвяр і пацярпелых.
Паветраныя сілы Ўкраіны зьбілі 16 ракет
У апэратыўным камандаваньні Паветраных сіл Украіны паведамілі, што Расея запусьціла на Ўкраіну 28 крылатых ракет рознага тыпу, 16 зь якіх былі зьнішчаныя сродкамі супрацьпаветранай абароны.
ГЛЯДЗІЦЕ ТАКСАМА: «Калі абстрэльвалі Адэсу, успамінаў 9 жніўня». Былы галоўны лекар менскага шпіталя Ачарэтні пра працу пад бамбёжкамі і Беларусь пасьля вайныВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.