Расея атакавала дронамі тылавыя вобласьці Ўкраіны і з артылерыі абстрэльвала прыфрантавыя паселішчы.
Полымя тушылі пры дапамозе пажарнага цягніка
Улады Ровенскай вобласьці заявілі пра інтэнсіўную атаку рэгіёну бесьпілётнікамі.
«Зьнішчаная нафтабаза на Дубеншчыне. Ахвяраў няма. На месцы працуюць 45 выратавальнікаў, 14 адзінак тэхнікі, залучаны пажарны цягнік. [...] Хімічны і радыяцыйны стан у норме. Эвакуацыі насельніцтва ня будзе», — паведаміў кіраўнік Ровенскай абласной вайсковай адміністрацыі Віталій Коваль.
На Кіеўшчыне абышлося без разбурэньняў. Усе бесьпілётнікі, накіраваныя расейскімі войскамі на рэгіён, зьбілі.
ГЛЯДЗІЦЕ ТАКСАМА: Расея абстраляла шматпавярховы жылы будынак у Херсоне. Ёсьць ахвярыУ Паветраных сілах Украіны паведамілі, адкуль Расея запускала дроны
У апэратыўным камандаваньні Паветраных сілаў Украіны заявілі, што ўсе дроны, выкарыстаныя Расеяй, мелі іранскае паходжаньне.
З 10 бесьпілётнікаў, запушчаных з раёну Курску, зьбілі 7 апаратаў.
ГЛЯДЗІЦЕ ТАКСАМА: Ва Ўкраіне канчаткова прызналі, што зь Беларусі абстрэлаў не было, але ракеты ляцелі над беларускай тэрыторыяйНа ўсходзе і поўдні Ўкраіны загінулі цывільныя
Увечары 9 жніўня расейскія войскі абстралялі Запарожжа. У выніку цаляньня ракет у жылы сэктар загінулі ня менш як тры жыхары і сем атрымалі раненьні. Пашкоджаныя гандлёвыя і адукацыйныя ўстановы і 13 шматпавярховых будынкаў.
На Данеччыне загінулі тры чалавекі, параненыя 10.
Расейская авіяцыя інтэнсіўна наносіць удары па пяці раёнах Харкаўскай вобласьці. Украінскія ўлады папярэдне сьцьвярджаюць, што ёсьць толькі параненыя. У сярэдзіне дня 10 жніўня харкаўскія ўлады паведамілі аб пачатку тэрміновай эвакуацыі дарослых и дзяцей праз узмацненьне абстрэлаў з боку Расеі.
У Днепрапятроўскай вобласьці Расея працягвае тэрарызаваць Нікапальскі раён. У выніку абстрэлаў пашкоджаныя шэсьць прыватных будынкаў і газаправод. Папярэдне ахвяраў няма.
ГЛЯДЗІЦЕ ТАКСАМА: У Нікапалі ва Ўкраіне ад расейскіх абстрэлаў загінуў 18-гадовы хлопец. У Маскве заявілі аб папярэджаньні новай атакі дронаміРасея абвінаваціла Ўкраіну ў новай атацы дронамі
Міністэрства абароны Расеі паведаміла пра атаку нібыта на Калускую і Маскоўскую вобласьці, а таксама на Севастопаль.
Паводле ўладаў Расеі, два бесьпілётнікі зьбітыя над Малаяраслаўскім раёнам Калускай вобласьці і над Адзінцоўскім раёнам Маскоўскай вобласьці. Непадалёк ад Севастопалю расейскія сродкі СПА зьбілі два дроны, яшчэ 9 не дасягнулі цэлі, бо іх нэўтралізавалі сродкі радыёэлектроннай барацьбы.
У той жа час крымскія тэлеграм-каналы паведамілі, што ўначы адбываліся выбухі ў Сакаўскім раёне.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.