Палітыка

У Літве не выключаюць, што ў нейкі момант ні Расея, ні Беларусь ня змогуць пракантраляваць вагнэраўцаў

Міністар замежных спраў Літвы Габрыелюс Ландсбергіс. Архіўнае фота

Міністар замежных спраў Літвы Габрыелюс Ландсбергіс заявіў, што ад Літвы павінна ісьці пасланьне: мы не баімся разьмяшчэньня вагнэраўцаў у Беларусі, а рыхтуемся да магчымых пагрозаў і ўзмацняем вайсковы патэнцыял.

Міністар замежных спраў Літвы Габрыелюс Ландсбергіс заявіў, што разьмяшчэньне вагнэраўцаў у Беларусі стварае рызыкі для бясьпекі, да якіх трэба рыхтавацца.

«Гэтаму варта надаць рэальную і абгрунтаваную ўвагу. Нам часта выкладаюць аргумэнты, маўляў, заходнія выведкі маюць вочы і ў Беларусі, і ў Расеі, бачаць усе рухі, будзьце спакойныя, тут нічога не адбудзецца зьнянацку, але рух „Вагнэра“ паказаў, што і зьнянацку нешта адбываецца», — заявіў Габрыелюс Ландсбергіс у эфіры LRT.

ГЛЯДЗІЦЕ ТАКСАМА: Лукашэнка расказаў, каго ён хоча пазбаўляць беларускага грамадзянства і што будуць рабіць вагнэраўцы ў Беларусі

Паводле яго, існуе пытаньне, наколькі Расея і Беларусь увогуле могуць кантраляваць вагнэраўцаў.

«Гэта дзьве нестабільныя дзяржавы, і цяжка сказаць, наколькі яны кантралююць гэтыя прыватныя арміі і што тыя могуць нарабіць. Мы маем вельмі дакладна фармуляваць: па-першае, гэта фактар небясьпекі, па-другое, нам трэба быць да гэтага падрыхтаванымі», — патлумачыў міністар замежных справаў Літвы.

Габрыелюс Ландсбергіс падкрэсьліў, што трэба не пабойвацца разьмяшчэньня вагнэраўцаў у Беларусі, а рыхтавацца да магчымых пагрозаў і ўзмацняць вайсковы патэнцыял.

ГЛЯДЗІЦЕ ТАКСАМА: Міністар абароны Літвы: Мы не зьбіраемся ўздрыгваць праз вагнэраўцаў у Беларусі
  • «Вагнэр» — расейская прыватная вайсковая кампанія. Фармальна яна не ўваходзіць у склад Узброеных сілаў РФ і не падпарадкоўваецца наўпрост Міністэрству абароны РФ. Аднак прэзыдэнт РФ Уладзімір Пуцін прызнаў, што гэтая ПВК фінансавалася зь дзяржаўнага бюджэту Расеі.
  • Вагнэраўцы бяруць удзел у наземных апэрацыях у Сырыі, Афрыцы і ў вайне з Украінай. Наймітаў падазраюць ва ўчыненьні шматлікіх ваенных злачынстваў.
  • Паводле зьвестак маніторынгавай групы «Беларускі Гаюн», з 11 ліпеня ў Беларусь прыбылі ўжо 13 калён з тэхнікай, якая можа належаць наймітам «Вагнэра».
  • Раней амэрыканскі Інстытут вывучэньня вайны (ISW) заявіў, што найміты ППК «Вагнэр», якія перабазаваліся ў Беларусь, не ўяўляюць ваеннай пагрозы для Польшчы ці Ўкраіны, «прынамсі, пакуль яны ня будуць пераабсталяваныя мэханізаванай тэхнікай».