Усяго ў дакумэнце 21 патрабаваньне.
Пастанову Міністэрства спорту і турызму з новымі патрабаваньнямі для экскурсаводаў апублікавалі на Нацыянальным прававым партале Беларусі.
Згодна зь іх зьместам, экскурсаводам цяпер трэба, сярод іншага:
- праяўляць павагу да дзяржаўных сымбаляў Рэспублікі Беларусь, гісторыі разьвіцьця беларускай дзяржаўнасьці;
- фармаваць уяўленьне аб Рэспубліцы Беларусь як аб краіне, прывабнай для турыстаў, экскурсантаў, не дапускаць пры правядзеньні экскурсій суб’ектыўных некарэктных ацэнак і выказваньняў аб Рэспубліцы Беларусь і іншых дзяржавах, а таксама рабіць захады для недапушчэньня з боку турыстаў, экскурсантаў або іншых асоб некарэктных, правакацыйных і іншых нэгатыўных выказваньняў ці дзеяньняў;
- прытрымлівацца агульнапрынятых этычных нормаў, падтрымліваць гонар і годнасьць сваёй прафэсіі, а таксама асабістыя гонар і годнасьць;
- не дапускаць дзеяньняў, якія парушаюць грамадзкі парадак або праяўляюцца ў відавочнай непавазе да грамадзтва;
- забясьпечваць пераклад тэксту экскурсіі на замежную мову або з замежнай мовы без скажэньня сэнсу;
- пры правядзеньні экскурсіі гіды павінны мець пры сабе бэйдж экскурсавода і сьпіс экскурсій, па якіх пройдзена атэстацыя.
За апошні год палітычны ціск на экскурсаводаў павялічыўся.
З 2023 году, згодна зь леташнім рашэньнем Савету міністраў, у Беларусі асоб з судзімасьцю паводле «пратэставых» і «палітычных» артыкулаў не дапускаюць да атэстацыі, якая пацьвярджае кваліфікацыю экскурсаводаў і гідаў-перакладчыкаў.
Летась у сьнежні 2022 года экскурсаводку Аксану Манкевіч пакаралі 3 гадамі «хатняй хіміі» паводле артыкулу аб грубым парушэньні парадку (342 КК). Месяцам раней за гэта 2,5 гадамі «хатняй хіміі» пакаралі таксама экскурсавода Ігара Хмару.
ГЛЯДЗІЦЕ ТАКСАМА: Беларускіх экскурсаводаў, якіх затрымлівалі ў адміністрацыйных справах, пазбаўляюць пасьведчаньняў