Прэзыдэнт Расеі Ўладзімір Пуцін і празь месяц пасьля мяцяжу ПВК «Вагнэр» ня вырашыў, што зрабіць з заснавальнікам кампаніі Яўгеніем Прыгожыным. Пра гэта на форуме аб бясьпецы ў Інстытуце Аспэна расказаў дырэктар Цэнтральнага выведвальнага ўпраўленьня (ЦРУ) ЗША Ўільям Бэрнс.
Па словах Бэрнса, ПВК «Вагнэр» мае важнае значэньне для Крамля, у тым ліку з прычыны прысутнасьці расейскіх наймітаў у Афрыцы і на Блізкім Усходзе.
Дырэктар ЦРУ мяркуе, што Пуцін, будучы помсьлівым, зараз спрабуе «аддзяліць» Прыгожына ад ПВК, а потым плянуе зьвесьці зь ім рахункі.
ГЛЯДЗІЦЕ ТАКСАМА: Украінская выведка пра вагнэраўцаў у Беларусі: «Яны едуць бяз зброі»Бэрнс таксама адзначыў, што Злучаныя Штаты ведалі аб мяцяжы ПВК «Вагнэр» загадзя. Рашэньне Прыгожына пачаць бунт было чаканым на фоне яго крытыкі кіраўніка Міністэрства абароны Расеі Сяргея Шайгу і начальніка Генэральнага штабу Валерыя Герасімава.
Кіраўнік Расгвардыі Віктар Золатаў пасьля бунту ПВК «Вагнэр» абвінаваціў у датычнасьці да арганізацыі мяцяжу заходнія спэцслужбы. Пры гэтым, паводле Золатава, расейскія ўлады ведалі аб плянах Прыгожына загадзя. Аднак Вашынгтон заяўляў, што ня мае дачыненьня да яго арганізацыі.
ГЛЯДЗІЦЕ ТАКСАМА: «Незадаволенасьць у Расеі вайной адкрывае для ЦРУ новыя магчымасьці», – дырэктар ЦРУСпроба ўзброенага мяцяжу ў Расеі. Асноўнае
- Увечары 23 чэрвеня кіраўнік ПВК «Вагнэр» Яўгеній Прыгожын заявіў, што міністэрства абароны РФ нанесла ракетныя ўдары па тылавых лягерах наймітаў і што «зло, якое нясе вайсковае кіраўніцтва краіны, будзе спынена».
- Міністэрства абароны Расеі назвала гэтыя словы «інфармацыйнай правакацыяй».
- Уначы Прыгожын паведаміў, што байцы «Вагнэра» ўвайшлі ў Расею з акупаваных раёнаў Ўкраіны.
- Раніцай 24 чэрвеня Прыгожын заявіў, што ПВК «Вагнэр» увайшла ў Растоў-на-Доне і ўзяла пад кантроль вайсковыя аб’екты Растова, у тым ліку аэрадром.
- Пазьней Прыгожын заявіў і пра ўзяцьце пад кантроль вайсковых абʼектаў у Варонежы.
- У Маскоўскай, Растоўскай і Варонескай вобласьцях РФ увялі надзвычайныя захады бясьпекі.
- У Расеі завялі крымінальную справу аб узброеным мяцяжы.
- Пуцін у ранішнім звароце заявіў, што «Расею мяцяжом спрабуюць штурхаць да паразы і капітуляцыі» і што «дзеяньні супраць мяцежнікаў будуць жорсткімі».
- Кіраўнік дэпартамэнту нацыянальнай бясьпекі ў складзе Аб’яднанага пераходнага кабінэту Валер Сахашчык у сувязі з падзеямі ў Расеі заклікаў беларусаў «выкарыстаць гістарычны шанец».
- Лідэрка дэмакратычных сілаў Беларусі Ціханоўская заклікала дыпляматаў і сілавікоў не выбіраць паміж Пуціным і Прыгожыным, а вайскоўцаў — выгнаць войскі Расеі зь Беларусі.
- Аб’яднаны пераходны кабінэт заявіў, што «дэнансуе палітычныя і ваенныя дамовы з Расеяй» і аб’яўляе аб выхадзе Беларусі з АДКБ, ЭАЭС і СНД.
- Полк Каліноўскага заклікаў грамадзянаў Беларусі рыхтавацца да «вызваленьня ад дыктатуры і акупацыі»
- Прэс-служба Аляксандра Лукашэнкі ўвечары 23 чэрвеня напісала, што той угаварыў заснавальніка ПВК «Вагнэр» Яўгенія Прыгожына спыніць прасоўваньне да Масквы.
- Пазьней Прыгожын заявіў аб завяршэньні марша і вяртаньні баевікоў у палявыя лягеры.
- Пазьней зьявілася навіна аб тым, што Прыгожын паедзе ў Беларусь, а крымінальную справу ў РФ супраць яго спыняць.
- 26 чэрвеня у Генпракуратуры Расеі паведамілі, што справу супраць Прыгожына не спынілі.
- 27 чэрвеня Аляксандар Лукашэнка пацьвердзіў прылёт у Беларусь кіраўніка ПВК «Вагнэр» Яўгенія Прыгожына. Найміты ПВК «Вагнэр», паводле Лукашэнкі, будуць працаваць у Беларусі інструктарамі, ім прапанавалі ў распараджэньне закінутую вайсковую частку.
- 2 ліпеня ПВК «Вагнэр» абвясьціла, што на месяц прыпыняе вэрбоўку ў свае шэрагі. Гэта патлумачылі часовым няўдзелам групоўкі ў вайне супраць Украіны і «пераездам у Рэспубліку Беларусь».
- У сярэдзіне ліпеня байцы ПВК сталі калёнамі прыбываць у лягер каля вёскі Цэль. Міністэрства абароны Беларусі абвясьціла пра сумесныя трэнаваньні на палігоне «Берасьцейскі».
- Былы лідэр прарасейскіх сэпаратыстаў на Данбасе Ігар Стралкоў-Гіркін у сваім тэлеграм-канале, спасылаючыся на аднаго з камандзіраў ПВК «Вагнэр», кіраўніка штабу з пазыўным «Маркс», паведаміў, што ў Беларусь прыбудзе да 10 тысяч байцоў «Вагнэру».
- Агулам у Беларусь прыехалі 12 калёнаў наймітаў. Там была і будаўнічая тэхніка.
- 23 жніўня, як паведаміла Расавіяцыя, Яўгеній Прыгожын загінуў у разьбітым самалёце пад Цьверру. Разам зь ім там быў адзін з камандзіраў ПВК «Вагнэр» Дзьмітрый Уткін.