Дарадца прэзыдэнта ЗША ў нацыянальнай бясьпецы Джэйк Саліван на прэс-брыфінгу ў Белым Доме ў пятніцу заявіў, што ЗША ўхваляюць перадачу Ўкраіне касэтных боепрыпасаў.
Саліван падкрэсьліў, што ЗША разумеюць усю небясьпеку касэтных боепрыпасаў, і таму доўга вагаліся з прыняцьцём такога рашэньня. Аднак, паколькі расейскія войскі ўжо выкарыстоўваюць падобныя снарады на тэрыторыі Ўкраіны, Украіна павінна мець магчымасьць абараняцца параўнальнай зброяй.
Таксама ён паведаміў, што атрымаў ад украінскага боку запэўніваньні, што той будзе выкарыстоўваць касэтныя боепрыпасы максымальна асьцярожна і пастараецца гарантаваць бясьпеку цывільных асобаў.
ГЛЯДЗІЦЕ ТАКСАМА: Расейскія войскі сотні разоў прымянялі забароненыя касэтныя боепрыпасы ва Ўкраіне, — дакладПа словах Салівана, ужываньне касэтных снарадаў заўсёды зьвязана з рызыкай, што некаторыя з выбуховых элемэнтаў не разарвуцца, і гэта запатрабуе наступнага разьмінаваньня. Але, сказаў ён, украінскія тэрыторыі, дзе ідуць баі, і так маюць патрэбу ў татальным разьмінаваньні, і ЗША будуць дапамагаць у ім Украіне незалежна ад таго, якую зброю яны пастаўляюць.
«Безумоўна, перадача дадатковых аб’ёмаў снарадаў ва Ўкраіну — вельмі істотны ўнёсак у паскарэньне працэдуры дэакупацыі, — заявіў агенцтву Reuters палітычны дарадца кіраўніка офісу прэзыдэнта Ўкраіны Міхаіл Падаляк. — Асабліва калі гаворка ідзе пра касэтныя боепрыпасы, якія, несумненна, здольныя аказваць незвычайнае псыхаэмацыйнае ўзьдзеяньне на і без таго дэмаралізаваныя расейскія акупацыйныя групоўкі».
ГЛЯДЗІЦЕ ТАКСАМА: Нуланд: «ЗША занепакоеныя выкарыстаньнем Расеяй касэтных бомбаў супраць мірнага насельніцтва»- Касэтныя бомбы — гэта снарады, ад якіх падчас палёту аддзяляецца касэтная частка з дробнымі суббоепрыпасамі. Яны расьсейваюцца і падаюць на вялікай плошчы. Часам яны не выбухаюць і фактычна мінуюць тэрыторыю, становячы небясьпеку для мірных грамадзянаў і асабліва дзяцей.
- У сьвеце з 2010 году дзейнічае Канвэнцыя аб забароне выкарыстаньня касэтных боепрыпасаў. Яе падпісалі больш за 100 краінаў. Найбуйнейшыя вытворцы і ўладальнікі касэтных боепрыпасаў — ЗША, Расея, Кітай, — не падпісалі канвэнцыю. Таксама прыняць дамову не пагадзіліся Беларусь, Індыя, Пакістан, Ізраіль, Паўднёвая Карэя і Ўкраіна.
- У дакладзе ініцыятывы па барацьбе з касэтнымі боепрыпасамі, апублікаваным у жніўні 2022 году, гаворыцца, што расейскае войска нанесла па Ўкраіне сотні ўдараў снарадамі такога тыпу. Украінская армія ўжыла такія боепрыпасы як мінімум тры разы — у Данецкай, Харкаўскай і Херсонскай абласьцях, адзначаюць аўтары дакумэнту.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.