Кіраўнік акупацыйнай расейскай улады Крыму Сяргей Аксёнаў заявіў, што ў ноч на 22 чэрвеня «быў нанесены ўдар» па Чангарскім мосьце, які злучае Крым і акупаваныя Расеяй Запароскую і Херсонскую вобласьці.
«Пацярпелых няма. Цяпер выбухатэхнікі праводзяць экспэртызу для ацэнкі тыпу боепрыпасаў. Профільныя службы пачалі абсьледаваць дарожнае палатно. Аб магчымасьці праезду паведамім цягам гадзіны», — напісаў Сяргей Аксёнаў у сваім тэлеграм-канале.
Акупацыйныя ўлады Крыму заклікалі грамадзян выбіраць іншую дарогу для паездак у Запароскую і Херсонскую вобласьці.
Крым з Херсонскай вобласьцю злучаюць тры дарогі: дзьве праз крымскі горад Армянск (праз Каланчак і Чаплынку, якія цяпер захапіла Расея. — РС) і адна — у раёне Джанкою праз Чангар. Менавіта праз Чангар Расея перакідвала вайсковую тэхніку ў Запароскую вобласьць.
ГЛЯДЗІЦЕ ТАКСАМА: У Падмаскоўі зьбілі тры дроны, ва Ўкраіне — 33. Расея штодня абстрэльвае ўкраінскія тэрыторыі на фронце і ў тылеКіеў: «Далей будзе»
Сьпікер Галоўнага ўпраўленьня выведкі Міністэрства абароны Ўкраіны Андрэй Юсаў пракамэнтаваў абстрэл Чангарскага мосту.
«Зараз ідзе праца, яна будзе прадоўжана. Гэта плянамерная праца Сіл бясьпекі, абароны, руху супраціву, мясцовага насельніцтва, якое чакае вяртаньня ўкраінскай законнай улады на гэтых тэрыторыях. Магу толькі камэнтаваць, што далей будзе», — сказа Андрэй Юсаў у эфіры «24 каналу».
Генэральны штаб Узброеных сіл Украіны паведаміў, што на запароскім і херсонскім кірунках расейскія войскі вядуць абарончыя дзеяньні, спрабуючы вярнуць пад свой кантроль горад Пяціхаткі Запароскай вобласьці. Паводле ўкраінскага Генштабу, расейцы наносяць інтэнсіўныя авіяцыйныя і артылерыйскія ўдары па населеных пунктах гэтага паўднёвага рэгіёну.
Генштаб таксама паведаміў, што за апошнія дзень ўкраінская авіяцыя нанесла 12 удараў па раёнах канцэнтрацыі расейскіх войскаў і шэсьць — па зэнітна-ракетных комплексах. Геаграфію сваіх удараў у Генштабе Ўзброеных сіл Украіны не ўдакладнілі.
Раней па такім жа сцэнары ўкраінскія сілы атакавалі Антонаўскі мост у Херсонскай вобласьці, пасьля чаго расейскія войскі вымушаны былі пакінуць горад Херсон.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.