Паводле інфармацыі «Нашай нівы», пры рэканструкцыі корпусу гістарычнага факультэта БДУ было знішчана дэкаратыўнае пано з выявай Кастуся Каліноўскага і паўстанцаў 1863 году.
Керамічнае пано размяшчалася ў адной з аўдыторый на чацьвёртым паверсе гістфаку БДУ.
Пано з выявай Кастуся Каліноўскага на гістарычным факультэце БДУ да разьбурэньня
На ім у поўны рост быў паказаны лідэр вызвольнага паўстаньня 1863–1864 гадоў на Беларусі Кастусь Каліноўскі і паўстанцы-касінеры на заднім фоне. У ніжняй частцы пано была зьмешчана цытата зь верша Янкі Купалы:
Я адплаціў народу,
Чым моц мая магла:
Зваў з путаў на свабоду,
Зваў зь цемры да сьвятла.
На фота ў кучы будаўнічага сьмецьця відаць фрагмэнты рэльефнай рамы, якая абрамляла выяву Каліноўскага, а таксама кавалкі іншых кампазыцый з аўдыторыі па матывах твораў Купалы.
Па інфармацыі «Нашай нівы», зьнішчэнне пано адбылося да поўнамаштабнага ўварваньня Расеі ва Ўкраіну ў 2022-м.
Рэканструкцыя корпусу цягнецца з 2021 году. Корпус гістфака БДУ — адзін з першых будынкаў, якія заняў створаны ў 1921 годзе Беларускі дзяржаўны ўніверсітэт. Згодна з заканадаўствам, творы манумэнтальна-дэкаратыўнага мастацтва ня могуць быць зьнішчаныя, а мусяць быць рэканструяваныя.
ГЛЯДЗІЦЕ ТАКСАМА: Падручнікі 90-х па гісторыі сьпісаць, Алексіевіч прыбраць, Быкава «інвэнтарызаваць». Як праходзяць «чысткі» ў беларускіх бібліятэках