Затрыманага ў Полацку сьвятара Беларускай грэка-каталіцкай царквы Аляксандра Шаўцова 26 траўня пакаралі 15 суткамі адміністрацыйнага арышту за рэпосты матэрыялаў сайту «Хартыя-97» у сацыяльнай сетцы «ЎКантакце».
Пра гэта BPN паведаміла крыніца, якая пажадала застацца ананімнай.
Шаўцова затрымалі раніцай 25 траўня.
ГЛЯДЗІЦЕ ТАКСАМА: У Полацку затрымалі грэка-каталіцкага сьвятара Аляксандра ШаўцоваТады ж была затрыманая першая загадчыца, а цяпер дацэнт катэдры архітэктуры і дызайну Полацкага дзяржаўнага ўнівэрсытэту (ПДУ) 76-гадовая Галіна Захаркіна. Яе аштрафавалі на 80 базавых велічыняў (2960 рублёў).
24 траўня 10-суткавым арыштам пакаралі загадчыцу катэдры геадэзіі і геаінфармацыйных сыстэмаў ПДУ 73-гадовую Галіну Шараглазаву і вядучую выкладчыцу катэдры сусьветнай літаратуры і замежных моў гэтай ВНУ Алену Храмцову.
ГЛЯДЗІЦЕ ТАКСАМА: Хроніка перасьледу 24 траўня: затрымалі каля паўтара дзясятка супрацоўнікаў Полацкага дзяржаўнага ўнівэрсытэту23 траўня ў Полацку і Наваполацку затрымалі каля паўтара дзясятка супрацоўнікаў ПДУ. Сярод іншых былі затрыманыя дацэнт катэдры канстытуцыйнага права і дзяржаўнага кіраваньня Сяргей Глазырын і дацэнт катэдры гісторыі і турызму Віктар Чарэўка. Абодва арыштаваныя на 15 сутак.
17 траўня сілавікі затрымалі супрацоўнікаў Наваполацкай цэнтральнай гарадзкой лякарні. Пяцярых пакаралі адміністрацыйнымі арыштамі.
29 і 30 сакавіка ў Полацку і Наваполацку прайшлі затрыманьні супрацоўнікаў Полацкага гісторыка-культурнага запаведніка, частка зь іх адбыла адміністрацыйныя арышты, у тым ліку некалькі разоў запар.