«Нічога ў практычным сэнсе зроблена не было», — прадстаўнік Беларусі ў ААН пра пляны Расеі разьмясьціць ядзерную зброю

— Гэтая абʼява аб разьмяшчэньні тактычнай ядзернай зброі ў Рэспубліцы Беларусь — перш за ўсё, гэта проста заява. Нічога ў практычным сэнсе не было зроблена ў гэтых адносінах, — сказаў Рыбакоў. — Па-другое, гэта сувэрэннае рашэньне любой дзяржавы абараняць сябе ад любых пагроз і выклікаў, зь якімі краіна сутыкаецца.

Рыбакоў запэўніў, што калі якое-небудзь рашэньне ў гэтай сфэры будзе прынятае, гэта будзе «рашэньне ўраду Беларусі, а не якой-небудзь іншай дзяржавы».

25 сакавіка прэзыдэнт Расеі Ўладзімір Пуцін заявіў, што Масква і Менск дамовіліся разьмясьціць тактычную ядзерную зброю на тэрыторыі Беларусі, аб чым «даўно прасіў» Аляксандар Лукашэнка. Паводле слоў прэзыдэнта Расеі, будаўніцтва спэцыяльнага сховішча для гэтых узбраеньняў скончыцца да 1 ліпеня 2023 году, піша Zerkalo.