Амэрыканскае выданьне The Washington Post са спасылкай на дакумэнты Пэнтагону, якія апынуліся ў адкрытай прасторы ў выніку несанкцыянаванага выцеку, паведаміла, што ўласьнік прыватнай вайсковай кампаніі «Вагнэр» Яўген Прыгожын нібыта прапанаваў украінскаму боку перадаць зьвесткі аб расейскіх пазыцыях у абмен на адыход Узброеных сіл Украіны з Бахмута Данецкай вобласьці.
У артыкуле адзначаецца, што сваю прапанову Яўген Прыгожын перадаў Украіне ў студзені праз свае кантакты ва ўкраінскай вайсковай выведцы. Дзьве ўкраінскія крыніцы пацьвердзілі журналістам, што расеец кантактаваў з выведнай службай. Адна зь іх сьцьвярджае, што Кіеў адхіліў прапанову, паколькі не давярае вагнэраўцам.
У яшчэ адным дакумэнце, складзеным, як сьцьвярджаецца, на аснове выведнай інфармацыі ЗША, паведамляецца, што Яўгеній Прыгожын нібыта асабіста сустракаўся з афіцэрамі ўкраінскай выведкі ў Афрыцы. Сьцьвярджаецца таксама, што на адной з такіх сустрэч ён расказаў аб нястачы боепрыпасаў у расейскіх войскаў і рэкамэндаваў украінцам пачаць наступ на Крым.
Яўгеній Прыгожын саркастычна пракамэнтаваў гэты фрагмэнт у сваім тэлеграм-канале.
«Нам увогуле няма чаго ўтойваць ад замежных спэцслужбаў, мы дагэтуль з Буданавым (кіраўнік вайсковай выведкі Ўкраіны. — РС) знаходзімся ў Афрыцы», — сказаў ён у сваім галасавым паведамленьні.
Расея на запыт The Washington Post не адказала, як і ўкраінская вайсковая выведка. Прэзыдэнт Украіны Ўладзімір Зяленскі не пацьвердзіў кантактаў зь Яўгененіем Прыгожыным.
ГЛЯДЗІЦЕ ТАКСАМА: «Расейцы гінуць, але атакуюць». Беларускі добраахвотнік расказаў, што цяпер адбываецца ў БахмуцеРасея і Ўкраіны вядуць баі за Бахмут з жніўня 2022 году. Наступ у горадзе ажыцьцяўляюць пераважна сілы ПВК «Вагнэр». Вайсковыя аналітыкі адзначалі высокую баяздольнасьць вагнэраўцаў у параўнаньні з рэгулярнай расейскай арміяй, аднак увесь горад ім так і не ўдалося захапіць.
Раней паведамлялася аб вялікіх стратах у расейскай арміі і ПВК «Вагнэр» у баях за Бахмут. Вясной Яўгеній Прыгожын заяўляў, што выведзе свае сілы з зоны баявых дзеяньняў праз канфлікт зь Міністэрствам абароны Расеі.
ГЛЯДЗІЦЕ ТАКСАМА: Ва Ўкраіне паведамілі аб вяртаньні стратэгічных пазыцый у Бахмуце і вялікай колькасьці расейскіх палонныхДакумэнты Пэнтагону, у тым ліку аб баях ва Ўкраіне, «зьліў» у інтэрнэт супрацоўнік выведнага падразьдзелу Вайскова-паветраных сіл Нацыянальнай гвардыі амэрыканскага штату Масачусетс Джэк Тэйшэйра. Пэнтагон не пацьвердзіў іхнай сапраўднасьці, а ў Расеі заяўлялі, што частка дакумэнтаў можа ўтрымліваць дэзынфармацыю.
ГЛЯДЗІЦЕ ТАКСАМА: Washington Post назвала крыніцай выцеку сакрэтных дакумэнтаў Пэнтагону супрацоўніка амэрыканскай вайсковай базыВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.