Жыхары кубінскага партовага гораду Кайманэры, разьмешчанага недалёка ад амэрыканскай вайсковай базы ў Гуантанама, паводле паведамленьняў у сацыяльных сетках, позна вечарам 6 траўня выйшлі на вуліцы, гэта першыя сёлета антыўрадавыя выступленьні на Кубе, піша Reuters.
На разьмешчаных у сацсетках відэазапісах, якімі падзяліліся кубінскія дысыдэнты і праваабарончыя арганізацыі, відаць, як людзі ў вайсковай форме і ў цывільным адзеньні ўступаюць у сутыкненьні зь дзясяткамі дэманстрантаў.
🇨🇺 | ATENCIÓN: Video muestra la brutal represión del régimen cubano contra los manifestantes en Caimanera, Guantánamo. pic.twitter.com/mMLg6R1YNT
— Última Hora Noticias (@UltimaHoraNo) May 7, 2023
«Кубінскія сілы бясьпекі жорстка адрэагавалі на мірныя пратэсты ў горадзе Кайманэра, пабіўшы грамадзян за патрабаваньне выконваць правы чалавека, — гаворыцца ў заяве амбасады ЗША ў Гаване. — Куба таксама закрыла свой інтэрнэт... Кубінскія рэпрэсіі жорсткія і бескарысныя; свабода заўсёды атрымлівае перамогу».
Журналістка кубінскага дзяржаўнага радыё Мабэль Паса заявіла ў сацыяльных сетках, што пратэставы выступ пачаўся, калі «грамадзяне, некаторыя ў нецьвярозым стане, (сталі) выкрыкваць заявы, накіраваныя супраць сацыяльных працэсаў, якія адбываюцца на Кубе і зьяўляюцца выказваньнем незадаволенасьці».
Паса напісала, што «сілы бясьпекі і іншыя спрыялі таму, каб адгаварыць людзей, якія выйшлі на вуліцу, далучацца да пратэсту, і каб яны вярнуліся да сябе дадому».
Кубінскія дысыдэнты і ЗША даўно вінавацяць улады Кубы ў блякаваньні інтэрнэт-трафіку па ўсёй краіне, калі на востраве пачынаюцца пратэставыя выступленьні.
ГЛЯДЗІЦЕ ТАКСАМА: Уцёкі з Кубы ў ЗША дасягнулі найвышэйшага паказьніка ў гісторыі ГЛЯДЗІЦЕ ТАКСАМА: «Я абавязкова вярнуся, калі ў Беларусі будзе іншае неба над галавой». Вялікае інтэрвію з кубінцам, які выходзіў на пратэсты