«Бабарыка ў хірургіі знаходзіцца», — адказалі ў Наваполацкай цэнтральнай гарадзкой лякарні на пытаньне аб тым, ці сапраўды Віктара Бабарыку шпіталізавалі.
Шпіталізацыю Віктара Бабарыкі пацьвердзілі і ягонаму штабу.
Паводле неафіцыйных зьвестак, у ягоных лёгкіх выявілі ваду.
У «пацыента з прозьвішчам Бабарыка 1963 году нараджэньня», які паступіў у наваполацкую бальніцу, «узялі аналізы, праводзіцца мэдычнае абсьледаваньне», паведаміла @pozirkonline крыніца, якая пажадала застацца неназванай.
Пазьней лекары пацьвердзілі камандзе Бабарыкі, што правялі абсьледаваньне, цяпер Віктару Бабарыку адводзяць вадкасьць зь лёгкіх. Ягоны стан ацэньваецца як сярэдняй цяжкасьці. Ён знаходзіцца пад назіраньнем мэдыцынскага пэрсаналу бальніцы. Аб прычынах шпіталізацыі па-ранейшаму не паведамляецца, піша @viktarbabarykaofficial.
26 красавіка «Рабочы рух» паведаміў, што зь некалькіх крыніц да іх паступіла інфармацыя аб тым, што ў ноч з 24 на 25 красавіка з ПК-1 Наваполацку ў Наваполацкую цэнтральную гарадзкую лякарню са шматлікімі цялеснымі пашкоджаньнямі даставілі Віктара Бабарыку.
Празь некалькі гадзін «Рабочы рух» апублікаваў чарговае паведамленьне:
«Інфармацыя пацьвердзілася, Віктар Бабарыка знаходзіцца ў аддзяленьні хірургіі, стан сярэдняй ступені цяжкасьці; вядома, што ў яго пнэўматоракс. Паступіў са сьлядамі пабіцьця, яго нават не пазналі, пакуль ня ўбачылі прозьвішча таго, хто паступіў!»
Удзень тэлеканал «Белсат» паведаміў, што, паводле ягонай інфармацыі, Віктара Бабарыку раніцай вывезьлі з бальніцы Наваполацку: яго забралі з хірургічнага аддзяленьня трое супрацоўнікаў калёніі ў форме і некалькі чалавек у цывільным.
Паводле крыніцы «Белсату» ў Наваполацкай бальніцы, у Віктара Бабарыкі стаіць дрэнажная прылада, але ён ходзіць сам: «Раніцай ішоў сам, яго кудысьці везьлі зь лякарні. Выглядае зьбітым, але ягоны дыягназ я ня ведаю», — сказала крыніца.
Што такое пнэўматоракс
Пнэўматоракс (ад ст.-грэч. πνεῦμα — павеў, паветра і θώραξ — грудзі) — скапленьне паветра або газаў у плеўральнай паражніне грудзей.
Яно можа ўзьнікнуць спантанна ў людзей без хранічных захворваньняў лёгкіх («першасны»), а таксама ў асоб з захворваньнямі лёгкіх («другасны»). Многія пнэўматараксы ўзьнікаюць пасьля траўмы грудной клеткі ці як ускладненьне лячэньня.
Ціханоўская патрабуе паказаць Бабарыку
Сьвятлана Ціханоўская запатрабавала ад афіцыйных уладаў публічна прадэманстраваць палітзьняволенага былога кіраўніка «Белгазпрамбанку» Віктара Бабарыку.
«Сёньня ноччу зьявілася інфармацыя аб тым, што Віктар Бабарыка трапіў у лякарню са сьлядамі пабіцьця. Мы патрабуем публічна прадэманстраваць, у якім ён стане. Мы патрабуем допуску адвакатаў і сваякоў да яго. Любыя іншыя дзеяньні будуць тлумачыцца як наўмыснае прычыненьне шкоды жыцьцю і здароўю», — напісала палітык.
ГЛЯДЗІЦЕ ТАКСАМА: Навіны палітвязьняў: Віктара Бабарыку 10 дзён трымалі ў штрафным ізалятары; у Беларусі ўжо больш за 1,2 тысячы палітвязьняўПаводле штабу асуджанага на 14 гадоў калёніі ўзмоцненага рэжыму Віктара Бабарыкі, некалькі месяцаў ад палітзьняволенага не паступала пісьмовая карэспандэнцыя, апошні час ён знаходзіўся ў ШЫЗА.
Раней праваабарончы цэнтар «Вясна» пісаў пра ўмовы ў наваполацкай калёніі. Так, сярод іншага, паводле сьведчаньня былых палітвязьняў у ПК-1:
- «У ШЫЗА штораніцы ліюць хлёрку па пяць літраў, каб асуджаныя ёю труціліся. Вокны не зачыняюць пры любым надвор’і, хоць на вуліцы будзе −30°. Іх асуджаныя завешваюць ручніком — адной зь нешматлікіх рэчаў, што належаць у ШЫЗА. Часам даходзіць да таго, што даводзіцца на акно вешаць анучу, якой мыеш падлогу ў ШЫЗА, у тым ліку і хлёрку. За гэта таксама могуць выпісаць рапарт і даць дзесяць сутак».
- «Начальнік калёніі асабіста ставіў на расьцяжку асуджаных»
- Зьняволеным у крытычным стане адмаўлялі ў мэдычнай дапамозе.
Перасьлед Віктара Бабарыкі. Што важна ведаць
- Віктара Бабарыку абвінавацілі ў «адмываньні» сродкаў, атрыманых злачынным шляхам (па частцы 2 арт. 235 КК), і атрыманьні хабару ў асабліва буйным памеры (па частцы 3 арт. 430 КК).
- У крымінальнай справе «Белгазпрамбанку» 122 тамы. Справу разглядаў Вярхоўны суд у будынку суду Маскоўскага раёну.
- 22 сакавіка абарона Бабарыкі заявіла пярэчаньні на прад’яўленыя абвінавачаньні, бо апісаньне, якое ёсьць у іх, не дазваляла ў дастатковай ступені зразумець, у якіх менавіта дзеяньнях абвінавачанага Бабарыкі ўгледзілі злачынства, заявіў адвакат Дзьмітры Лаеўскі. Таксама ён адзначыў, што ў абвінавачаньні няма апісаньня інкрымінаваных дзеяньняў з указаньнем часу, месца, спосабу, іншых абставінаў іх учыненьня. Адвакат папрасіў далучыць да матэрыялаў справы дакумэнт, у якім выклаў «дэфэкты абвінавачаньня».
- Віктар Бабарыка віны не прызнае.
Хроніка перасьледу
- 10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць тых, хто адмаўляецца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
- 11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў за адмываньне грошай і ўхіленьне ад выплаты падаткаў у асабліва буйным памеры.
- Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога кампрамату на яго.
- 11 чэрвеня арыштавалі каардынатарку выбарчага штабу Бабарыкі Сьвятлану Купрэеву па абвінавачаньні ва ўхіленьні ад выплаты падаткаў у асабліва буйным памеры.
- 12 чэрвеня Лукашэнка заявіў, што Бабарыка таксама датычны да справы, маўляў, «гэта адна шайка-лейка». Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
- Фігурантамі «справы „Белгазпрамбанку“» сталі каля 20 чалавек.
- 15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскія акцыянэры банку («Газпромбанк» і «Газпром») назвалі гэтае рашэньне незаконным.
- 17 чэрвеня ўлады арыштавалі без тлумачэньняў выбарчы фонд Віктара Бабарыкі з 100 тысячамі рублёў на рахунку.
- 18 чэрвеня затрымалі Віктара Бабарыку і яго сына Эдуарда Бабарыку — кіраўніка ініцыятыўнай групы. У дамах сям’і Бабарыкаў прайшлі ператрусы.
- Кіраўнік КДК Іван Тэртэль назваў Бабарыку «непасрэдным арганізатарам» «махлярскай схемы з адмываньнем грошай» з удзелам былых і дзейных топ-мэнэджараў «Белгазпрамбанку».
- 19 чэрвеня праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы.
- Штаб Бабарыкі падрыхтаваў да здачы 435 тысяч подпісаў.
- 20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
- 2 ліпеня стала вядома, што Бабарыку вінавацяць па трох фінансавых артыкулах Крымінальнага кодэксу.
- 14 ліпеня ЦВК адмовіў Віктару Бабарыку ў рэгістрацыі празь неадпаведнасьць прадстаўленай дэклярацыі аб даходах і маёмасьці.
- 10 кастрычніка Лукашэнка сустрэўся зь Віктарам Бабарыкам і іншымі палітвязьнямі ў СІЗА КДБ.
- 17 лютага 2021 году пачаўся суд над Віктарам Бабарыкам і былымі супрацоўнікамі «Белгазпрамбанку». На працэс не пусьцілі нікога зь незалежных журналістаў.
- 6 ліпеня Бабарыку асудзілі на 14 гадоў пазбаўленьня волі. Вырак вынес судзьдзя Ігар Любавіцкі. Бабарыка не прызнаў віны, ягоныя абаронцы яшчэ раз заявілі аб палітычных матывах справы.
- 12 ліпеня стала вядома, што Бабарыку этапавалі ў ПК №1 у г. Наваполацак.
- 12 кастрычніка з ізалятараў выйшлі некалькі чалавек, затрыманых у справе «Белгазпрамбанку». Ім зьмянілі меру стрыманьня, але іншыя падрабязнасьці справы невядомыя.
- У кастрычніку 2023 году арганізацыя былых сілавікоў BelPol паведамляла, што Віктар Бабарыка ў калёніі мае праблемы з сэрцам. Паводле інфармацыі арганізацыі, Бабарыку нанесьлі «сур’ёзныя цялесныя пашкоджаньні», прычым зрабілі гэта людзі, якія не адносяцца да пэрсаналу наваполацкай калёніі, дзе той сядзіць.