Зь велікодным пасланьнем і дабраславеньнем Urbi et Orbi зьвярнуўся папа Францішак, які 9 красавіка ўзначаліў велікодную імшу на пляцы Сьвятога Пятра ў Ватыкане. У сваёй казані, зьвяртаючыся да Бога, пантыфік узгадаў украінскі і расейскі народы.
«Дапамажы любаму ўкраінскаму народу на шляху да міру і пралі велікоднае сьвятло на расейскі народ. Суцеш параненых і тых, хто страціў на вайне сваіх блізкіх, а таксама паклапаціся, каб палонныя вярнуліся цэлымі і здаровымі да сваіх сем’яў. Адкрый сэрцы ўсёй міжнароднай супольнасьці, каб прыкласьці намаганьні, каб пакласьці канец гэтай вайне і ўсім канфліктам, якія паліваюць сьвет крывёю», — сказаў папа.
Папа Францішак таксама заклікаў расейцаў імкнуцца даведацца праўду пра вайну ва Ўкраіне.
З пачатку поўнамаштабнага ўварваньня Расеі ва Ўкраіну папа Францішак амаль ва ўсіх сваіх публічных выступах згадваў Украіну і ўсё часьцей крытыкаваў Маскву.
ГЛЯДЗІЦЕ ТАКСАМА: Папа Рымскі заснаваў Апостальскую адміністратуру для беларускіх уніятаў