Хроніка перасьледу 5 красавіка: у Менску затрымалі праграмістку; адваката Сям'янава зноў арыштавалі на 15 дзён; затрыманьні ў Гомлі

У Менску затрымалі праграмістку

У Менску затрымалі 30-гадовую праграмістку — знайшлі ў яе пнэўматычную зброю і бел-чырвона-белы сьцяг, паведамляе МУС.

У міліцыю зьвярнуўся «неабыякавы грамадзянін», які расказаў, што, праходзячы ля шматпавярховіка на вуліцы Гінтаўта, убачыў у акне кватэры на шостым паверсе бел-чырвона-белы сьцяг.

На гэты адрас прыехалі сілавікі. Гаспадыняй кватэры была 30-гадовая жанчына, якая працуе праграмістам у прыватнай фірме.

Паводле МУС, у яе кватэры нібыта знайшлі пнэўматычную зброю — аўтамат і чатыры пісталеты, а ў смартфоне — падпіску на «экстрэмісцкія» тэлеграм-каналы. Жанчыну затрымалі і адправілі ў ІЧУ.

Адваката Арцёма Сям'янава зноў арыштавалі на 15 дзён

Адваката, як і мінулы раз, абвінавацілі паводле арт. 24.3 КаАП (непадпарадкаваньне міліцыянту), паведамляе «Вясна».

Яго павінны былі вызваліць з Акрэсьціна раніцай 4 красавіка, але перазатрымалі наўпрост у цэнтры ізаляцыі правапарушальнікаў у межах новай справы. 5 красавіка над адвакатам адбыўся чарговы суд.

Арцёма Сям'янава затрымалі напрыканцы сакавіка падчас «аблавы» на адвакатаў. Адвакат, сярод іншага абараняў Валянціна Стэфановіча, Аляксандра Францкевіча, Тацяну Кузіну, Ігара Лосіка, Паўла Белавуса і шмат каго зь іншых палітвязьняў.

У Гомлі — чарговая аблава сілавікоў

Мяркуючы па відэа сілавікоў, затрымана сама меней 8 чалавек. Калі да іх прыходзілі, не паведамляецца. Частку людзей затрымалі за падпіскі на «экстрэмісцкія» тэлеграм-каналы, а іншых, выглядае, нават не за палітыку, піша «Наша Ніва».

Адна з затрыманых — 23-гадовая Аліна Галінская. Яна кажа, што некалі была падпісаная на «экстрэмісцкія» каналы і пакідала там камэнтары. Яшчэ адзін затрыманы — 67-гадовы гамяльчук Ігар Лісоўскі. Яго таксама вінавацяць у «падпісцы на тэлеграм-каналы».

Прыходзілі таксама да 20-гадовага Марка Лебянка. За што яго затрымалі, няясна, бо ён кажа, што ня мае «экстрэмісцкіх» падпісак. У яго абсалютна не палітычныя сацсеткі, а на адным з фота ў «УКантакце» ён стаіць на ўрачыстай лінейцы «Гомсельмаша» побач з чырвона-зялёным сьцягам.

Яшчэ двое затрыманых кажуць, што некалі былі падпісаныя на «экстрэмісцкія» каналы, аднаго затрымалі за татуіроўку зь вядомым тэкстам пра копаў. Адзін з мужчын у відэа кажа, што быў судзімы за крадзеж магнітолы, але за што яго ўзялі цяпер — незразумела.

У Гомлі затрымалі таксіста

Бацьку дваіх непаўналетніх дзяцей, таксіста Рамана Арцёменку жорстка затрымаў АМАП яшчэ ў канцы студзеня, калі ён чакаў кліента каля аўтавакзала. Пра гэта стала вядома толькі ў красавіку, піша "Вясна".

Сябры чакалі Рамана з «сутак», і ім было вядома, што яго затрымалі за старыя падабайкі ў сацыяльнай сетцы «Аднаклясьнікі». Цяпер Арцёменка знаходзіцца ў гомельскім СІЗА.