«Чаму я засяроджваю на гэтым увагу? Таму што ўчора прагучалі камэнтары дарадцы прэзыдэнта Літвы наконт таго, што ёсьць намер накласьці вэта на гэты законапраект. Мы зараз працуем над тым, каб гэтага не адбылося, таму гэты працэс усё яшчэ трэба адсочваць: у дэмакратычных краінах заканатворчы працэс не канчаецца на тым, што штосьці прынята», — адзначыла яна.
Рыхтэр таксама падкрэсьліла, што прыняты закон, напрыклад, прынцыпова не зьмяняе для грамадзян Беларусі абмежаваньні па візах (паводле дакумэнту, атрыманьне візаў магчымае толькі пры падтрымцы МЗС) — так для беларусаў было і раней.
Сэйм Літвы ўхваліў законапраект аб абмежавальных мерах у дачыненьні да грамадзян Беларусі і Расеі ў сувязі з ваеннай агрэсіяй супраць Украіны 4 красавіка.
Дакумэнь прадугледжвае прыпыненьне прыёму заяў на атрыманьне візаў для грамадзянаў Расеі і Беларусі, за выключэньнем выпадкаў, калі падача заявы ажыцьцяўляецца пры пасярэдніцтве Міністэрства замежных спраў Літвы.
Для расейцаў уводзіцца часовае прыпыненьне падачы заявак на атрыманьне часовага пасьведчаньня на жыхарства, беларусаў гэтая частка закону не закране.
2 красавіка галоўны дарадца прэзыдэнта Літвы Кястуціс Будрыс заявіў, што Гітанас Наўседа можа накласьці вэта на гэты закон, калі яго прымуць у рэдакцыі, якая тычыцца расейцаў у большай ступені, чым беларусаў.