Затрыманьні ў Дзяржынску
У Дзяржынску зноў адбываюцца затрыманьні і ператрусы, паведаміла «Вясна». Паводле тэлеграм-канала «Койданава 2022», аўтобус сілавікоў стаіць побач з домам па вуліцы Ціхая, 3а.
На працягу апошніх трох дзён у Дзяржынску і ваколіцах праходзяць масавыя ператрусы і затрыманьні. Гэта зьвязана з тым, што 31 сакавіка ўздоўж дарогі каля гораду хтосьці вывесіў сьцяжкі Беларусі і Ўкраіны, а пры спробе іх зьняць сілавікі нібыта знайшлі выбуховую прыладу.
Агулам за гэтыя дні затрымалі каля 45 чалавек, паведамляе «Вясна», але большую частку адпусьцілі, некаторых пакінулі ў мясцовым РАУСе чакаць судоў па адміністрацыйных артыкулах.
Мясцовыя жыхары расказалі «Вясьне» падрабязнасьці затрыманьняў у Дзяржынску.
«Па некаторых адрасах хадзілі ўчастковыя, правяралі тэлефоны, амаль усім ставілі нейкі бот, падаецца, «Магніт» называецца, але і правяралі падпіскі, лайкі, прагляды, перапіску. Некалькі чалавек расказалі, што ім усталявалі маячкі на машыны».
Сілавікі затрымалі мужчыну за камэнтары
За камэнтары ў інтэрнэце сілавікі затрымалі чарговага беларуса. «Пакаяльнае» відэа зь ім зьявілася ў праўладным тэлеграм-канале. Пра затрыманьне пішуць праваабаронцы.
Мужчыну закідаюць аўтарства больш як 3 тысяч «экстрэмісцкіх» камэнтароў цягам апошніх двух гадоў, а таксама перакрыцьцё дарог падчас пратэстаў у 2020 годзе.
ГЛЯДЗІЦЕ ТАКСАМА: «Сьледчы сказаў: „Будзеце адказваць за мужа“». Падрабязнасьці затрыманьня хворай жанчыны ў Гомельскай вобласьціФігурантам «справы прафсаюзаў» пакінулі прысуд у сіле
Абвінавачаныя па «справе прафсаюзу РЭП» палітзьняволеныя Васіль Берасьнеў, Генадзь Фядыніч і Вацлаў Арэшка былі асуджаныя 5 студзеня. Фядынічу і Берасневу прызначылі 9 гадоў калёніі, а Арэшку — 8 гадоў калёніі.
31 сакавіка ў Вярхоўным судзе пачалі разглядаць апэляцыйныя скаргі палітвязьняў. Пасьля агалошваньня скаргі і выступу абаронцаў судовая калегія пад старшынствам судзьдзі Пятра Лістраценкі прыняла рашэньне перанесьці пасяджэньне на 3 красавіка.
А 3 красавіка судовая калегія пакінула прысуд бязь зьменаў, а скаргі — без задавальненьня. Палітвязьняў цяпер этапуюць у калёніі.