Страйк пачаўся з прэсавай канфэрэнцыі, а потым грузавыя аўтамабілі накіраваліся да Варшавы. Грузавікі не заяжджалі ў польскую сталіцу, а проста аб’ехалі яе па акружнай дарозе, паведамляе выданьне Mostmedia.
Чаго патрабуюць страйкоўцы
Галоўная прычына забастоўкі — незадаволенасьць польскіх перавозчыкаў тым, што іх выцясьняюць з рынку беларускія і расейскія перавозчыкі.
У арганізатараў забастоўкі чатыры патрабаваньні:
- Блякаваньне ўезду расейскіх і беларускіх фур у Польшчу.
- Забарона на рэгістрацыю ў Польшчы кампаній зь беларускім і расейскім капіталам.
- Увядзеньне адказнасьці грузаадпраўшчыка за аплату паслуг транспартнай кампаніі.
- Аднаўленьне дазволаў для ўкраінскіх перавозчыкаў на двухбаковыя перавозкі.
Свае патрабаваньні пратэстоўцы перададуць ураду і дадуць 14 дзён на іх выкананьне:
«Калі адказу ня будзе, мы ня спынімся на папераджальным страйку», — камэнтуюць арганізатары забастоўкі.
ГЛЯДЗІЦЕ ТАКСАМА: Польскія перавозчыкі выйдуць на пратэст з патрабаваньнем забараніць уезд для беларускіх і расейскіх фурСтрайк падтрымалі ня ўсе
Страйк перавозчыкаў, арганізаваны кааліцыяй кансэрватыўных палітычных партый, ухваляюць ня ўсе прадстаўнікі транспартнай галіны Польшчы.
Прэзыдэнт асацыяцыі TLP Мацей Уронскі заявіў, што акцыя, якую арганізавалі транспартнікі з Усходняй Польшчы, не заслугоўвае прасоўваньня ў публічным полі.
«Мне па-чалавечы сорамна. Мне сорамна за маіх калег-перавозчыкаў, якія не разумеюць, што ва Ўкраіне гінуць людзі, руйнуецца суседняя краіна, а яе абаронцы спыняюць расейскую агрэсію. Агрэсію, якая, калі б ня іх барацьба, празь некалькі гадоў магла б распаўсюдзіцца на Польшчу, Літву, Латвію і Эстонію», — дадаў ён.
Прэзыдэнт TLP дадаў, што не разумее забароны ці перашкоды для беларусаў адкрываць бізнэс у Польшчы.
«Падчас апошніх фальсыфікаваных прэзыдэнцкіх выбараў яны паказалі, што як нацыя яны на баку дэмакратыі. Канечне, яны павінны дзейнічаць у адпаведнасьці з польскім законам, як і польскія перавозчыкі. І тут зьяўляецца роля польскіх правяраючых службаў, якія павінны сачыць за тым, каб закон выконваўся. Як у кампаніях з польскім, так і зь беларускім капіталам», — заявіў ён.