Лідэр Кітайскай народнай рэспублікі Сі Цзіньпін наведае Маскву з 20 па 22 сакавіка з афіцыйным візытам у той час, як Пэкін адначасова імкнецца выказаць падтрымку расейскаму прэзыдэнту Ўладзіміру Пуціну і прапануе свой мірны плян, накіраваны на спыненьне вайны Расеі супраць Украіны.
«У часе перамоў будуць абмяркоўвацца актуальныя пытаньні далейшага разьвіцьця дачыненьняў усебаковага партнэрства і стратэгічнай супрацы паміж Расеяй і Кітаем», — адзначаецца ў паведамленьні Крамля 17 сакавіка.
«Плянуецца таксама абмен думкамі ў кантэксьце паглыбленьня расейска-кітайскай супрацы на міжнароднай арэне», — дадалі ў Крамлі.
ГЛЯДЗІЦЕ ТАКСАМА: У Маскве холадна ўспрынялі мірны плян Пэкіна аб вайне Расеі супраць УкраіныКітай, які абвясьціў аб «бязьмежным» саюзе з Расеяй незадоўга да таго, як Масква пачала поўнамаштабнае ўварваньне ва Ўкраіну, 24 лютага прадставіў уласны мірны плян.
У Эўразьвязе заявілі, што «кітайскі мірны плян не адрозьнівае агрэсара ад ахвяры». Вярхоўны прадстаўнік Эўрапейскага Зьвязу ў пытаньнях замежных спраў і палітыкі бясьпекі Жузэп Бурэль заявіў 27 лютага, што дасягнуць спыненьня вайны ва Ўкраіне магчыма на аснове рэзалюцыі Генэральнай асамблеі ААН і мірнага пляну, прапанаванага ўкраінскім прэзыдэнтам Уладзімірам Зяленскім.
ГЛЯДЗІЦЕ ТАКСАМА: У Брусэлі не пабачылі ў прапановах Кітаю мірнага пляну і пацьвердзілі падтрымку ўкраінскай формулы міруУ Маскве заклікалі вывучыць нюансы прапановы, якая заклікае абодва бакі пагадзіцца на паступовую дээскаляцыю і перасьцерагае ад выкарыстаньня ядзернай зброі.
Прэзыдэнт Украіны Ўладзімір Зяленскі заявіў, што прапанова Кітая «не інфраструктура для чагосьці. Ёсьць нейкія пункты, якія мне зразумелыя. Ёсьць думкі, зь якімі я ня згодзен».
У сваю чаргу міністар замежных спраў Украіны Дзьмітро Кулеба заявіў, што ўкраінскі бок пільна вывучыць прапанаваны Кітаем мірны плян.
Андрэй Ярмак, кіраўнік Офісу прэзыдэнта Ўкраіны, заявіў, што абнародаваная Кітаем пазыцыя зьяўляецца добрым сыгналам патэнцыйнай гатоўнасьці ўзяць удзел у мірным урэгуляваньні.
«Аднак неабходна паглядзець на дзеяньні. Трэба дакладна зразумець, што Кітай насамрэч мае на ўвазе і што ён гатовы зрабіць, каб дапамагчы завяршыць гэтую вайну. Будзе вельмі вялікай і небясьпечнай памылкай, калі Кітай вырашыць пастаўляць любое ўзбраеньне і тое, што дапаможа расейцам і далей забіваць украінцаў, зьнішчаць цывільную інфраструктуру. І гэта будзе супярэчыць той пазыцыі мірнага ўрэгуляваньня, якую Кітай дэкляруе», — сказаў Андрэй Ярмак.
ГЛЯДЗІЦЕ ТАКСАМА: Лукашэнка выправіўся ў свой 13-ы візыт у Кітай, абмеркаваў гандаль і мірны плян Пэкіну для ЎкраіныВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.