Навіны палітвязьняў: У актывісткі Гнаўк пагоршылася здароўе, анархіста Раманава зноў будуць судзіць

У 65-гадовай актывісткі Алены Гнаук пагоршылася здароўе, пра гэта ейным родным расказала былая адвакатка жанчыны:

«Адвакат паведаміла, што яна моцна схуднела, у яе трасуцца рукі. Алена Пятроўна ўсё роўна гне сваю праўду, нягледзячы на невыносныя ўмовы, і зусім сябе не беражэ».

Вядома, што палітзьняволеная адмовілася ад адвакаткі, бо тая падпісала пратакол допыту, нягледзячы на просьбу Алены не рабіць гэтага.

Нядаўна Гнаўк зьмясцілі ў ПКТ да 24 лютага, паведамляе «Вясна». Яе таксама пазбавілі амаль усіх перадач, званкоў, спатканьняў і скарацілі «атаварку» з 3 базавых велічыняў да 1 (32 рублі). Акрамя гэтага, яе зьбіраюцца судзіць паводле ч. 1 арт. 411 КК за «злоснае непадпарадкаваньне патрабаваньням адміністрацыі калёніі».

Пакаранага 20 гадамі зьняволеньня анархіста Раманава зноў будуць судзіць

Нядаўна стала вядома, што ў ваўкавыскай калёніі нумар 11 зьняволенага анархіста Сяргея Раманава зноў пакаралі 15 днямі ў штрафным ізалятары (ШЫЗА). Пра гэта паведамляла ініцыятыва #dissidentby.

Раманава ў сьнежні 2022 году зьмяшчалі ў памяшканьне камэрнага тыпу (ПКТ) на 4 месяцы. Вядома, што супраць яго завялі новую крымінальную справу паводле арт. 411 КК РБ «Злоснае непадпарадкаваньне», якую ўжо перадалі ў пракуратуру. Пакараньне па гэтым артыкуле прадугледжвае ад 1 да 2 гадоў пазбаўленьня волі.

Паводле праваабарончага цэнтру «Вясна», новую справу палітвязьня 23 сакавіка у Ваўкавыску будзе разглядаць судзьдзя Мікалай Талашка.

Раней, у канцы 2021 году, Сяргея Раманава асудзілі на 20 гадоў пазбаўленьня волі.