У Мінэнэрга Беларусі назвалі інфармацыю літоўскай выведкі «мэтанакіраванай акцыяй па дыскрэдытацыі БелАЭС», накіраванай на фармаваньне нэгатыўнага стаўленьня да яе «праз разьдзіманьне ўяўнай пагрозы станцыі для міжнароднай супольнасьці».
У Мінэнэрга запэўнілі, што ў 2022 годзе на станцыі прайшлі плянавыя рамонтныя работы, якія адпавядалі ўсім патрабаваньням наглядных органаў і міжнародных нормаў, а Беларусь ня толькі не хавала іх правядзеньне ад суседзяў, але і адказвала на пытаньні.
У ведамстве заявілі, што падчас плянавага рамонту на першым энергаблёку правялі кантроль мэталу абсталяваньня і трубаправодаў, але ня выявілі «ніводнага дэфэкту, які ўяўляе пагрозу для ядзернай і радыяцыйнай бясьпекі — тым больш, які патрабуе дэмантажу рэактара». Тым часам, у другім паўгодзьдзі 2023 году плянуецца ўвесьці ў эксплуатацыю другі энэргаблёк БелАЭС.
У паведамленьні літоўскай выведкі, апублікаваным 9 сакавіка, гаварылася, што ў траўні 2022 году «сыстэмы кантролю БелАЭС устанавілі, што зьявіліся расколіны ў верхніх швах корпуса рэактара 1-га блёку», і ліквідаваць іх, паводле ацэнкі спэцыялістаў, можна, толькі зьняўшы рэактар, «аднак з палітычных прычын такі варыянт нават не разглядалі».
Паводле выведкі, тэхнічныя праблемы перашкаджалі запуску другога блёку БелАЭС. У лютым 2022 году зафіксавалі хімічную зьмену складу вады, якая ахалоджвае рэактар блёку, — яна была забруджаная смоламі. Таксама ў паведамленьні адзначалася: «цалкам імаверна, што дэфэкты тэхнічных дэталяў былі і пасьля запуску другога блёку».
ГЛЯДЗІЦЕ ТАКСАМА: Мінэнэрга Беларусі паведаміла аб новым рамонце на першым блёку АЭС ГЛЯДЗІЦЕ ТАКСАМА: Улады пачалі абмяркоўваць пабудову 3-га блёку Астравецкай АЭС, хаця першы пастаянна дае збоі