У паведамленьні Дэпартамэнту па кантролі за замежнымі актывамі Міністэрства фінансаў ЗША падкрэсьліваецца, што рашэньне прымеркавана да Міжнароднага жаночага дня 8 сакавіка, і яно прынята ў каардынацыі з саюзьнікамі Вашынгтону.
«Турмы Ірану сумнавядомыя жорсткім абыходжаньнем са зьняволенымі і іх сьмерцямі. Жанчыны-зьняволеныя асабліва пакутуюць ад сэксуальнага гвалту, катаваньняў і іншых жорсткіх, бесчалавечных і прыніжаючых годнасьць відаў абыходжаньня», — гаворыцца ў заяве.
У санкцыйны сьпіс, акрамя іншага, трапілі высокапастаўленыя прадстаўнікі пэнітэнцыярнай сыстэмы Ірана — Алі Чахармахал, кіраўнік турэмнага ведамства правінцыі Альборз, і Дарыюш Бахшы, начальнік цэнтральнай турмы Аруміе ў правінцыі Заходні Азэрбайджан.
Санкцыі ўведзены таксама супраць Махдзі Аміры — намесьніка генэральнага пракурора Ірана, адказнага за інтэрнэт-цэнзуру, — і галоўнакамандуючага іранскай арміяй Саеда Абдалрахіма Мусаві. Сьцвярджаецца, што вайсковыя падразьдзяленьні ўдзельнічалі ў падаўленьні пратэстаў у Іране, якія пачаліся ў верасьні мінулага году пасьля гібелі праваабаронцы Махсы Аміні. Войскі пад камандаваньнем Мусаві, як сцьвярджаецца, адкрывалі агонь з кулямётаў па ўдзельніках акцый пратэсту.
Тым жа рашэньнем з санкцыйнага сьпісу ЗША выключаны чатыры даччыныя кампаніі расейскага банку «Сбер» у Казахстане. Па якіх прычынах гэта зроблена, ведамства не ўдакладняе.
- 22-гадовая Махса Аміні ў верасьні мінулага году была затрымана паліцыяй нораваў па абвінавачаньні ў няправільным нашэньні хіджаба. З паліцэйскага ўчастка Аміні павезьлі ў бальніцу, дзе яна празь некалькі дзён памерла. Пратэстоўцы лічаць, што прычынай яе сьмерці стала зьбіцьцё супрацоўнікамі сілавых структур.
- Неўзабаве ў Іране пачаліся вулічныя пратэсты. Людзі выступалі з лёзунгамі супраць паліцэйскага гвалту, супраць барацьбы іранскіх уладаў з іншадумствам, за дэмакратызацыю краіны і за зьвяржэнне аяталы Алі Хаменэі.
- Пратэсты жорстка падаўляліся. Паводле праваабаронцаў, за час масавых акцый больш за 600 дэманстрантаў былі забітыя, каля 20 тысяч чалавек узялі пад варту. Некалькі чалавек былі пакараныя сьмерцю.