Журналісты выданьня «Важные истории» ўстанавілі імёны і лёс дзяцей з Марыюпалю, якіх выводзілі на сцэну падчас мітынгу-канцэрту на маскоўскім стадыёне «Лужнікі» 22 лютага з удзелам Пуціна.
Выданьне піша, што сярод іх былі 15-гадовая Аня Навуменка і яе малодшая сястра Караліна, якая падчас канцэрту закрывала вушы ад гучных гукаў. Журналісты даведаліся, што маці дзяўчынак загінула падчас абстрэлу Марыюпалю расейскімі вайскоўцамі ў красавіку 2022 году.
«Калі пачалася вайна, сям’я Навуменкі — Вольга зь яе грамадзянскім мужам Артурам і дзеці Аня, Караліна і Даня — спачатку хавалася ад абстрэлаў у левабярэжным цэнтры культуры (былы ДК будаўнікоў), а потым у будынку левабярэжнай адміністрацыі. Вольга загінула ў першых днях красавіка — яна, як сьцьвярджаюць відавочцы, „выбегла за цыгарэтамі“, і яе забіла аскепкамі недалёка ад 4-й бальніцы», — сказана ў матэрыяле «Важных историй».
Журналісты змаглі ідэнтыфікаваць толькі Аню і Караліну, дзе знаходзіцца іх брат Данііл — невядома. Мяркуючы па ўсім, сёстры цяпер жывуць у Марыюпалі, а на канцэрт іх прывезьлі. Двое падлеткаў з Марыюпалю паведамілі «Важным историям», што Аня Навуменка вучыцца разам зь імі, а зьехала дзяўчынка ўсяго «на тыдзень».
ГЛЯДЗІЦЕ ТАКСАМА: У Расеі за асьвятленьне вайны з Украінай заблякавалі больш за 10 тысяч сайтаўАкрамя гэтага, журналісты ўстанавілі, што на сцэне быў 10-гадовы Косьця Верашчагін. «Важные истории» пішуць, што яго бацькі жывыя, і мяркуючы па фатаграфіях у іх інстаграм-акаўнтах, яны знаходзяцца ў Марыюпалі. Па словах знаёмых, сям’я Верашчагіных не збіралася зьяжджаць з Марыюпалю назусім нават падчас абстрэлаў і хацела перачакаць у іншым месцы некаторы час. Як кажа адзін з суразмоўцаў, сям’я знаходзіцца ў Маскве «ў кароткачасовай камандзіроўцы».
Трое іншых дзяцей, якіх вывелі на сцэну ў «Лужніках», паводле зьвестак «Важных историй», зьяўляліся ў ток-шоў Андрэя Малахава на «Расеі-1» у кастрычніку 2022 году.
Мітынг-канцэрт, прысьвечаны Дню абаронцы Айчыны, адбыўся ў Маскве 22 лютага 2023 году. Тэлеграм-канал «Можем объяснить» раней указваў, што практычна ўсе апытаныя людзі з канцэрту заявілі, што іх прымусілі прыйсьці на мерапрыемства. Выступленьне Пуціна доўжылася каля трох з паловай хвілін: ён павіншаваў прысутных, праслухаў гімн і сышоў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.