Пра гэта гаворыцца ў сумесным дасьледаваньні арганізацыі OONI (Open Observatory of Network Interference) і праекта «Роскомсвобода».
Асноўным ініцыятарам большасьці блякаваньняў, зьвязаных з «дыскрэдытацыяй» расейскага войска, стала Генпракуратура РФ, бо паводле яе рашэньня можна абмяжоўваць доступ да сайтаў абыходзячы судовы працэс.
У тым ліку летась быў заблякаваны сайт расейскай службы Радыё Свабода, які адным зь першых трапіў пад цэнзуру.
Агулам за 2022 год з розных прычынаў у Расеі заблякавалі амаль 250 тысяч рэсурсаў, пры гэтым колькасьць блякаваньняў рэзка ўзрасла да канца 2022 году: калі за першыя 11 месяцаў улады блякавалі ў сярэднім па 19,4 тысячы сайтаў, у сьнежні ў бан патрапілі рэкордныя 34,2 тысячы рэсурсаў.
Паводле дасьледчыкаў, найчасьцей траплялі пад блякаваньне наступныя катэгорыі сайтаў:
- сайты ўкраінскіх і іншых замежных мэдыя,
- антыкарупцыйныя расьсьледаваньні і рэсурсы,
- VPN-сэрвісы,
- сайты з «уцечкай» пэрсанальных дадзеных расейцаў,
- ЛГБТК±тэматычныя сэрвісы, сайты з анімэ, музыкай і кліпамі, а таксама гульні, у якіх згадвалася вайна ва Ўкраіне.
У Беларусі 2022 годзе заблякавалі больш за 3 тысячы інтэрнэт-рэсурсаў.
У 2021–2022 гадах па заявах МУС інфармацыйная прадукцыя 778 тэлеграм-каналаў і іншых інтэрнэт-рэсурсаў прызнана судамі экстрэмісцкімі матэрыяламі. Больш за 300 тэлеграм-каналаў і чатаў прызнаны экстрэмісцкімі фармаваньнямі. Спынена дзейнасьць больш як 160 тэлеграм-каналаў і чатаў.
Апошнім часам у Беларусі ўсё часьцей затрымліваюць і заводзяць палітычна матываваныя крымінальныя справы за так званую «экстрэмісцкую дзейнасьць»: ёй улады прызнаюць удзел у пратэстах, выказваньні ў інтэрнэце супраць уладаў і супраць расейскага ўварваньня ва Ўкраіну і інш.
