У Эўрапарлямэнце пастанавілі з 2035 году не выпускаць аўтамабілі з рухавікамі ўнутранага згараньня, паведамляе DW.
Большасьць эўрадэпутатаў 14 лютага прагаласавалі за забарону на продаж у ЭЗ машын з бэнзінавымі і дызэльнымі маторамі з 2035 году. У выніку канчаткова зацьверджаная дамоўленасьць, дасягнутая Эўрапарлямэнтам і краінамі Эўразьвязу ў кастрычніку 2022 году.
Пасьля гэтай дамоўленасьці не хапала толькі канчатковага яе ўхваленьня бакамі. Краіны-сябры ЭЗ далі дабро яшчэ ў лістападзе, цяпер зялёнае сьвятло даў і Эўрапарлямэнт. Згодна з прынятым рашэньнем, з 2035 году ў Эўразьвязе павінны выпускацца толькі аўтамабілі з нулявым выкідам вуглякіслага газу.
ГЛЯДЗІЦЕ ТАКСАМА: Як пад Кіевам дакумэнтуюць экалягічныя злачынствы вайны для трыбуналу над Расеяй і БеларусьсюАдным з спрэчных пунктаў было пытаньне аб тым, ці зрабіць выключэньне для аўтамабіляў з вугляродна-нэўтральным сынтэтычным палівам. Так званае электрапаліва (E-Fuel) вырабляецца з дапамогай электраэнэргіі з вады і вуглякіслага газу. Гэтае пытаньне даручылі вывучыць Эўракамісіі.
Зацьверджаныя цяпер Эўрапарлямэнтам правілы былі ўзгодненыя ў рамках «зялёных» плянаў ЭЗ «Fit for 55», мэта якіх — скарачэньне выкідаў парніковых газаў у Эўразьвязе на 55 працэнтаў да 2030 году.
ГЛЯДЗІЦЕ ТАКСАМА: «40% апытаных ня ведаюць, у якім рэжыме працуе цяпер БелАЭС». Вынікі сацыялягічнага дасьледаваньня