Суд таксама пастанавіў пазбавіць супрацоўнікаў спэцыяльных званьняў і забараніў ім займаць пасады ў органах бясьпекі тэрмінам на тры гады.
У ліпені мінулага года прадстаўнік Генпракуратуры Казахстана Серык Шалабаеў казаў, што ў Алмацінскай вобласьці падазраванымі ў справе аб ужываньні катаваньняў з выкарыстаньнем распаленага праса ў дачыненьні да затрыманых падчас студзеньскіх 2022 году пратэстаў сталі пяцёра супрацоўнікаў паліцыі. Трое зь іх адразу прызналі віну. Пацярпелымі былі прызнаны 25 чалавек. Адзін з найбольш вядомых выпадкаў – катаваньні затрыманага Азамата Батырбаева. Самога Батырбаева ўлады прыгаварылі да ўмоўнага тэрміну па абвінавачаньні ва «ўдзеле ў масавых беспарадках».
Гісторыя з катаваньнямі прасам выклікала вялізны ўсплёск народнага абурэньня ў Казахстане. Адзін з актывістаў нават прынёс прэзыдэнту Касыму-Жамарту Такаеву «падарунак» у выглядзе праса, падкрэсьліўшы, што гэта – сымбаль катаваньняў, якія казахстанскія сілавікі ўжываюць у адносінах да затрыманых за пратэсты – з галоснага ці негалоснага распараджэньня Такаева.
Суд па справе «пра прас» пачаўся ў верасьні мінулага года. Пацярпелыя, якія спачатку патрабавалі строгага пакараньня для падсудных, пазьней раптоўна папрасілі прызначыць сілавікам умоўнае пакараньне. Пацярпелыя тлумачылі гэта тым, што «прэзыдэнт дараваў удзельнікам пратэстаў, а мы даруем ім, яны выканалі нашыя патрабаваньні». Ці былі гэтыя заявы зробленыя пад ціскам уладаў – невядома.
У прэс-службе суду адзначылі, што судзьдзя ўлічыў «поўнае прызнаньне віны, добраахвотнае пакрыцьцё шкоды, наяўнасьць на ўтрыманьні малалетніх дзяцей» у абвінавачаных сілавікоў.
У мінулым месяцы ў Алматы суд прыгаварыў двух супрацоўнікаў паліцыі да трох гадоў турмы, яшчэ аднаму прызначыў абмежаваньне волі па справе аб катаваньнях.