Раніцай 20 студзеня зьявілася інфармацыя аб шпіталізацыі экс-прэзыдэнта Казахстану Нурсултана Назарбаева ў кардыяхірургічны цэнтар.
Першапачаткова аб гэтым паведаміў казахстанскі мэдыямэнэджар Аляксандар Аксюціц.
«Мае крыніцы паведамілі, што Нурсултан Назарбаеў шпіталізаваны ў адну зь лякарняў Астаны. Яму праводзяць комплекснае абсьледаваньне сэрца. Мэдпэрсанал гаворыць, што, магчыма, будзе хірургічнае ўмяшаньне», — напісаў Аксюціц на сваёй старонцы ў сацыяльнай сетцы ў пятніцу.
Пазьней прэс-сакратара Назарбаева паведаміў, што былы прэзыдэнт Казахстану перанёс апэрацыю на сэрцы пасьпяхова, пагрозы жыцьцю няма.
Нурсултан Назарбаев перенес операцию на сердце. Операция прошла успешно. Угрозы жизни Первого Президента нет. Сейчас он находится под наблюдением. Операция проходила в Национальном научном кардиохирургическом центре под руководством известного кардиохирурга Ю.Пя
— Aidos Ukibay (@Aidos_Ukibay) January 20, 2023
- 82-гадовы Нурсултан Назарбаеў пайшоў у адстаўку ў сакавіку 2019 году, але захоўваў значны ўплыў на палітыку краіны. У студзені 2022 году масавыя пратэсты ў буйных гарадах з антыназарбаеўскімі лёзунгамі перарасьлі ў беспарадкі, сутыкненьні дэманстрантаў з паліцыяй і арміяй, цэнтральныя ўлады нейкі час ня мелі кантролю над найбуйнейшым горадам Алматы.
- Пасьля гэтага першы прэзыдэнт страціў пазыцыі ва ўладзе. Ягоныя сваякі пакінулі высокія пасады, некаторыя апынуліся пад вартай як падазраваныя ў крадзяжах.
- Улетку 2022 году ў Казахстане прайшоў рэфэрэндум аб папраўках да Канстытуцыі. Зьмены ў Асноўным законе падтрымалі больш за 77% грамадзян. У выніку, сярод іншага, з тэксту Канстытуцыі прыбралі ўсе згадкі пра Назарбаева як лідэра нацыі, ці «елбасы».