У Беларусі зьмянілі парадак і ўмовы інфармаваньня мэдыкаў прадстаўнікамі фармакалягічных кампаній.
Міністэрства аховы здароўя апублікавала пастанову, паводле якой такое інфармаваньне павінна праводзіцца «праз вусныя выступы з распаўсюджваньнем інфармацыйных матэрыялаў, пры правядзеньні мерапрыемстваў, вызначаных Міністэрствам аховы здароўя».
Пастанова выключае магчымасьць прадстаўнікам фармакалягічных кампаній наведваць службовыя кабінэты кіраўнікоў арганізацый або іншых службовых асоб. Прадугледжана перадача інфармацыйных матэрыялаў у электронным выглядзе або на папяровым носьбіце без наведваньня арганізацый.
У Міністэрстве аховы здароўя спадзяюцца, што такія меры дапамогуць пазьбегнуць крымінагенных і карупцыйных рызык у сыстэме аховы здароўя.
- У сьнежні стала вядома пра так званую «справу фармацэўтаў». Тады прадстаўнік Генпракуратуры расказаў пра выкрытую схему «подкупу мэдыкаў для прасоўваньня прадукцыі замежнай фармацэўтычнай кампаніі». Паводле сьледзтва, фармкампаніі заключалі з дактарамі дамовы і плацілі ім грошы нібыта за чытаньне лекцый, а ў сапраўднасьці — за рэкамэндацыі пацыентам набываць пэўныя прэпараты.