Міністэрства падаткаў і збораў стварыла працоўную групу, каб вырашыць «касавы крызіс», які доўжыцца з 2 студзеня

Група павінна забясьпечыць «каардынацыю дзеяньняў зацікаўленых» у адпаведнасьці з кампэтэнцыяй. У яе склад увайшлі прадстаўнікі самога Міністэрства падаткаў і збораў, Міністэрства антыманапольнага рэгуляваньня і гандлю, Дзяржаўнага камітэту ў стандартызацыі, Беларускага дзяржаўнага інстытуту стандартызацыі і сэртыфікацыі, а таксама самога ТАА «Туссон».

У ведамстве нагадалі, што на сайце МПЗ апублікаваны парадак дзеяньняў суб’ектаў, калі ў іх паўсталі праблемы з працай касавых апаратаў «Туссон».

Маштабны збой у працы абсталяваньня адбыўся 2 студзеня і закрануў гандлёвыя сеткі «Ома», «Востраў чысьціні», «Эўраопт», запраўкі «Беларуснафта» і іншыя сеткі.

У кампаніі «Тусон» прычынай збою назвалі праблемы з праграмным забесьпячэньнем.

Частка аб’ектаў да раніцы 3 студзеня ўжо пачалі працаваць, аднак шмат у якіх крамах праблема засталася, таму падаткоўцы ўвялі паслабленьні па касах «Тусон» да яе вырашэньня. На разьвязаньне праблемы давалі 10 дзён.