У Адэсе мясцовыя ўлады завяршылі дэмантаж помніка расейскай імпэратрыцы Кацярыне II. Пра гэта паведамілі ў Адэскай гарадзкой радзе. У пасёлку Катоўскага дэмантавалі помнік палкаводцу Аляксандру Сувораву.
«Нарэшце дэмантавалі помнік расейскай імпэратрыцы Кацярыне ІІ у Адэсе. Дзякуй адэсітам, якія выказалі сваю пазыцыю, што расейскай імпэрскай спадчыне ня месца ў сучаснай прававой дэмакратычнай Украіне. Дзякуй дэпутатам Адэскай рады за прыняцьце правільнага рашэньня», — сказаў Марчанка.
На пачатку лістапада ў Адэсе скульптуру Кацярыны II абнесьлі агароджай і нацягнулі чорны мяшок. Побач разьмясьцілі аб’яву, што помнік расейскай імпэратрыцы рыхтуюць да дэмантажу. Помнік афіцыйна называецца помнікам «Заснавальнікам Адэсы», а не Кацярыне асобна, хоць менавіта яе каменная статуя зьяўляецца цэнтральнай фігурай манумэнту.
Гісторыкі кажуць, што насамрэч Адэса была заснавана ў пачатку XV стагодзьдзя ў часы Вялікага Княства Літоўскага (ВКЛ).
У Адэсе раней прайшло галасаваньне — большасьць гараджан выказаліся за дэмантаж помніка «Заснавальнікам Адэсы». 30 лістапада Адэская гарадзкая рада прагаласавала за дэмантаж і перанос помніка. Кацярыну і чатырох яе фаварытаў перададуць у мясцовы мастацкі музэй. Туды ж адправяць і Суворава.
ГЛЯДЗІЦЕ ТАКСАМА: У Вільні пачалі дэмантаж савецкіх скульптур на Антокальскіх могілках, нягледзячы на забарону камітэту ААН. ФОТА