Згодна з матэрыяламі справы, якія паведамляе пракуратура ЗША, абвінавачаныя ў складзе групы навучалі кліентаў хлусіць пад прысягай для атрыманьня прытулку ў ЗША і рыхтавалі адпаведныя падробленыя дакумэнты.
Кліентамі «Русской Америки» былі ў асноўным грамадзяне Расеі і краін СНД. Яны зьвярталіся ў фірму, каб атрымаць візу, грамадзянства ці іншы прававы статус у ЗША. Супрацоўнікі «Русской Америки» дапамагалі і з атрыманьнем прытулку, нават усьведамляючы, што некаторыя кліенты ня маюць для яго законных падстаў.
Для гэтага Данской, напрыклад, параіў украінцу расказаць афіцэрам, што ён гей і за гэта яго перасьледуюць на радзіме. Пры гэтым Данской ведаў, што кліент быў гетэрасэксуальным мужчынам і не перасьледаваўся.
Па дапамогу Данской зьвяртаўся ў тым ліку да іміграцыйнай юрысткі Джуліі Грынберг. Яна прадстаўляла інтарэсы кліентаў «Русской Америки» на гутарцы і вучыла іх хлусіць пад прысягай. Гетэрасэксуальнаму ўкраінцу яна рэкамэндавала апрануцца, «як гей», і расказала, як правільна адказваць на пытаньні.
Таксама Данской і ягоны напарнік Юры Моша дапамагалі кліентам атрымліваць працоўныя візы з дапамогай фіктыўных дамоваў арэнды і падробленых офісаў, каб стварыць у афіцэраў уражаньне, што кліенты маюць законную працу ў ЗША.
Моша быў асуджаны ў гэтай справе раней. Яго абвінавацілі, у прыватнасьці, у тым, што ён прапаноўваў кліентам завесьці апазыцыйны блог і зманіць, што ім небясьпечна вяртацца на радзіму празь іхныя выдуманыя палітычныя погляды. Калі ў кліента не хапала жаданьня ці ведаў для вядзеньня блога, ён наймаў прафэсіянала на баку.
ГЛЯДЗІЦЕ ТАКСАМА: У ЗША канчаецца дзеяньне ўведзеных у сувязі з COVID-19 абмежаваньняў на прыём імігрантаў ГЛЯДЗІЦЕ ТАКСАМА: Прэзыдэнт ЗША Байдэн урачыста падпісаў закон аб прызнаньні аднаполых шлюбаў