«З сытуацыі, якая склалася з Netflix, калі нашу Русь (спадзяюся, што выпадкова і ненаўмысна) зблыталі з Расеяй, а нашага Яраслава Мудрага зрабілі князем земляў Паўночнай Расеі, ёсьць дзьве высновы: 1. Маем яшчэ шмат працы ў адукаваньні міжнароднай аўдыторыі ў нашай гісторыі; 2. Цесныя кантакты з партнэрамі дапамагаюць вырашыць сытуацыю амаль імгненна», — напісаў ён у Тэлеграм-канале.
Ткачэнка падзякаваў кампаніі ды яе рэгіянальнаму дырэктару Алексу Лонгу.
«Што там у самім сэрыяле — яшчэ высьвятляем. Але спадзяюся, што надалей такіх сытуацыяў будзе менш», — дадаў міністар.
Напярэдадні адзін з акаўнтаў Netflix у сацыяльных сетках, прысьвечаны сэрыялу «Вікінгі: Вальгала», апублікаваў сьпіс пэрсанажаў другога сэзону. Сярод іх князь Яраслаў Мудры, якога ў кампаніі назвалі «каралём Паўночнай Расеі», і «Алена, дачка расейскага двараніна».
Карыстальнікі сацыяльных сетак раскрытыкавалі кампанію, указаўшы на тое, што Яраслаў быў кіраўніком Кіеўскай Русі, а Расеі як дзяржавы не існавала ў той час, калі адбываюцца падзеі сэрыялу.
У выніку акаўнт выправіў апісаньні абодвух пэрсанажаў, паказаўшы на іх паходжаньне з Кіеўскай Русі і зазначыўшы, што папярэдняя інфармацыя была недакладнай.
ГЛЯДЗІЦЕ ТАКСАМА: Міністар культуры Ўкраіны паўшчуваў Netflix за «абразьлівы» вобраз украінкі ў сэрыяле