Расея ўпершыню зь сярэдзіны кастрычніка зьмяніла стратэгію абстрэлаў — звычайна расейскія войскі канцэнтравана абстрэльвалі Ўкраіну па панядзелках і з раніцы, але апошні абстрэл адбыўся ў другі дзень тыдня, калі сьветлавы дзень ужо заканчваўся.
Свабода сабрала апошнюю інфармацыю пра ракетную атаку Расеі на Ўкраіну 15 лістапада.
Больш за 10 гадзін безь сьвятла і сувязі
Пасьля абстрэлаў жыхары 15 вобласьцяў Украіны засталіся без электраэнэргіі, а некаторыя — і бяз сувязі.
Расея пачала абстрэлы пасьля 15-й гадзіны, у канцы сьветлавога дня. Цемра ахапіла спачатку Кіеў, а потым паступова Кіеўскую, Жытомірскую, Ровенскую, Валынскую, Івана-Франкоўскую, Львоўскую, Адэскую, Цярнопальскую, Чаркаскую, Харкаўскую, Хмяльніцкую, Чарнавіцкую, Сумскую і Чарнігаўскую вобласьці.
«Я была аптымісткай пасьля першых дзьвюх расейскіх атак, але тое, што я пабачыла ўчора, было падобна да найстрашнейшых фільмаў жахаў.
Я вярталася з працы на машыне. Калі раней, падчас веерных адключэньняў, сьвятлафоры хаця б дзе-небудзь працавалі, то ўчора горад падсьвечвалі толькі фары аўтамабіляў. Кіроўцы вымушана зьніжалі хуткасьць, бо рух не рэгуляваўся, а пешаходы хаатычна пераходзілі дарогі. Нямногія былі зь ліхтарыкамі. Кіроўцы мяне зразумеюць.
Горад выдаваў адзін працяжны манатонны гук аднаго гучнага электрагенэратара. Ад іх усё ж дзе-нідзе працавалі невялікія крамы і кавярні. Цяжка перадаць гэта словамі», — падзялілася ўражаньнямі з Свабодай адна з кіяўлянак.
У Кіеве пасьля абстрэлаў
Паводле яе, уначы электраэнэргію падключалі і адключалі некалькі разоў.
«Даводзілася лавіць гэтыя дзясяткі хвілінаў, каб падсілкаваць свой ноўтбук, тэлефоны і ліхтарыкі. Пра „лёс“ іншай электратэхнікі ўжо ня думаеш. Сэрца сьціскаецца, калі назіраеш, як Расея сыстэмна зьнішчае вялікія і малыя ўкраінскія гарады. Не ўяўляю, як гэта ўсё можна будзе аднавіць, бо наперадзе яшчэ зіма», — дадала яна.
ГЛЯДЗІЦЕ ТАКСАМА: Новая ракетная атака на Кіеў і іншыя гарады Ўкраіны. Зноў пацярпелі жылыя дамы і энэргетычныя аб'ектыПацярпела энэргетыка ў большай частцы рэгіёнаў Украіны
Паводле ўкраінскіх уладаў, ад расейскай атакі пацярпелі 15 з 27 рэгіёнаў Украіны, а ў іх — 30 энэргетычных аб’ектаў, дадаткова да тых, што пашкодзіла Расея першымі двума ўдарамі ў кастрычніку.
Ва ўрадзе пакуль не ўдакладняюць, якія менавіта аб’екты пацярпелі. Міністар энэргетыкі Герман Галушчанка заявіў, што цяперашняя атака адаб’ецца ня толькі на ўкраінскіх спажыўцах, але закране і суседнія з Украінай дзяржавы.
Найперш ідзецца пра Малдову, жыхары якой часткова засталіся безь сьвятла пасьля новай расейскай атакі на ўкраінскую энэргетыку — у выніку абстрэлу пашкоджана адна зь лініяў, якою энэргія йшла з Украіны. Цяпер Малдова вымушана тэрмінова шукаць новых пастаўнікоў, каб замяніць аб’ёмы, што дагэтуль атрымлівала з Украіны.
Блэкаўт у Львове
У Генэральным штабе ўдакладнілі, колькі ракет дасягнулі цэлі
У Генэральным штабе Ўзброеных сіл Украіны паведамілі, што 15 лістапада Расея выпусьціла больш за 90 ракет Х-101 і «Калібр» — удвая зь лішкам больш у параўнаньні з 10 кастрычніка, калі Расея ўпершыню канцэнтравана атакавала ўкраінскую энэргетыку.
Апроч таго, Расея залучыла больш за 10 ударных іранскіх дронаў «Shahed-136». Украінскія вайскоўцы сьцьвярджаюць, што сродкамі супрацьпаветранай абароны зьбілі 77 крылатых ракет і зь дзясятак дронаў-камікадзэ.
У выніку расейскай атакі 15 лістапада ва Ўкраіне загінулі 6 чалавек і яшчэ 17 параненыя.
У Офісе генэральнага пракурора Ўкраіны паведамілі, што сярод загінулых — жыхарка адной зь вёсак Кіеўскай вобласьці, якая ў момант абстрэлу была на могілках. Яна атрымала сьмяротныя раненьні, калі прыйшла наведаць магілу мужа.
Па ўсіх фактах расейскіх абстрэлаў 15 лістапада завялі крымінальныя справы.
Наступствы падзеньня ракеты ў Польшчы
Украінскія энэргетыкі працавалі ўсю ноч
Раніцай улады паведамілі, што ў сямі з 15 пацярпелых рэгіёнаў энэргетыкі змаглі збалянсаваць патокі і вярнуць сьвятло пэўнай частцы спажыўцоў. Але энэргазабесьпячэньне ня сталае — яно можа выключыцца ў кожную хвіліну. Кіраўнікі ўсіх пацярпелых гарадоў сьцьвярджаюць, што сытуацыя застаецца складанай.
Наступствы расейскай ракетнай атакі на Кіеў
Кампанія «Укренерго» заклікала ўкраінцаў падрыхтавацца да большага часу энэргаабмежаваньняў. «Зрабіце неабходны запас вады, своечасова падсілкуйце прылады і паўэрбанкі, каб быць на сувязі з роднымі», — паведамілі ў кампаніі.
ГЛЯДЗІЦЕ ТАКСАМА: Чэскі парлямэнт прызнаў Расею «дзяржавай-спонсарам тэрарызму»Кіеў зноў просіць NATO закрыць неба
Міністар абароны Ўкраіны Аляксей Рэзьнікаў заявіў, што пасьля таго, як ракеты заляцелі на тэрыторыю Польшчы, зноў актуальным становіцца пытаньне аб закрыцьці неба.
«Гэта рэальнасьць, аб якой мы папярэджвалі. Мы прасілі закрыць неба, бо неба ня мае межаў», — напісаў Аляксей Рэзьнікаў на сваёй старонцы ў Twitter.
Міністар абароны падкрэсьліў, што расейскія некіраваныя ракеты небясьпечныя ня толькі для Ўкраіны, але і для краін-суседзяў, сяброў Эўрапейскага Зьвязу і NATO.
ГЛЯДЗІЦЕ ТАКСАМА: МЗС Польшчы правяло размову з расейскім амбасадарам пасьля падзеньня «ракеты расейскай вытворчасьці» ў краінеШто кажуць у Расеі
Міністэрства абароны Расеі зьняпраўдзіла ўсе паведамленьні ўкраінскага боку аб пашкоджаных жылых будынках у Кіеве і аб расейскай прыналежнасьці ракеты, у выніку выбуху якой у Польшчы загінулі два чалавекі.
«Усе разбурэньні, якія дэманструе кіеўскі рэжым у жылых кварталах украінскай сталіцы, ёсьць простым наступствам падзеньня і самаліквідацыі запушчаных украінскімі войскамі зэнітных ракет з разьмешчаных у межах гораду ўкраінскіх і замежных комплексаў супрацьпаветранай абароны», — напісала расейскае вайсковае ведамства.
У міністэрстве абароны Расеі таксама пераконваюць, што і ракета, што выбухнула ў Польшчы, «адназначна ідэнтыфікаваная расейскімі спэцыялістамі абаронна-прамысловага комплексу як элемэнты зэнітнай кіраванай ракеты С-300 Паветраных сіл Украіны».
ГЛЯДЗІЦЕ ТАКСАМА: Новая ракетная атака на Кіеў і іншыя гарады Ўкраіны. Зноў пацярпелі жылыя дамы і энэргетычныя аб'ектыВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.