Адпаведны дакумэнт апублікаваны 8 лістапада на сайце дзяржаўных закупак і падпісаны вайсковым камісарам вобласьці палкоўнікам Алегам Канавалавым. Цана закупу — 500 беларускіх рублёў. Тэрмін пастаўкі тавару — лістапад-сьнежань 2022 году. Найменьне тавару значыцца як мабілізацыйнае прадпісаньне вайсковаабавязанага, прызначанага ў каманду. Закуп фінансуецца зь дзяржаўнага бюджэту.
Скрын аўкцыённага дакумэнта
У верасьні 2022 году Гомельскі абласны вайсковы камісарыят ужо закупіў 30 тысяч блянкаў позваў, а 31 кастрычніка абвясьціў тэндэр на закуп яшчэ 30 тысяч блянкаў позваў для прызыўнікоў і 70 тысяч для вайсковаабавязаных. Сумарна, у параўнаньні зь мінулым годам (каля 50 тысяч блянкаў), выходзіць рост у 2,6 раза.
Абласны вайсковы камісарыят у Берасьці на пачатку лістапада закупляў 120 тысяч блянкаў для позваў на прызыў, 100 тысяч позваў агульнага выкліку і 180 тысяч — пэрсанальных мабілізацыйных позваў.
«Гэтыя закупы могуць сьведчыць як пра вайсковую актыўнасьць, так і быць часткаю працы для дэзынфармацыі патэнцыйнага праціўніка», — пісала тады выданьне «Флагшток».
ГЛЯДЗІЦЕ ТАКСАМА: Навіны магчымай мабілізацыі. Беларусы просяць зьмяніць закон аб воінскім абавязку, ваенкаматы закупляюць блянкі для позваў