Гендырэктар «Прыпяцкага» Юры Апановіч расказаў Качанавай, што асноўныя віды дзейнасьці ў парку — дрэваапрацоўка, турыстычная дзейнасьць і лясная гаспадарка.
Паводле яго, у студзені — жніўні гэтага году нацпарк наведалі на 70 працэнтаў больш турыстаў, чым за 9 месяцаў мінулага. Дрэваапрацоўка, на думку Апановіча, таксама прынясе сёлета больш грошай, чым летась.
«Калі ў мінулым годзе экспарт склаў $9 млн, то за 9 месяцаў гэтага году — ужо $7,6 млн. Па годзе, думаю, атрымаем $10 млн», — цытуе пляны гендырэктара агенцтва Белта.
Сёлета ў нацпарку пачалі рэалізацыю, паводле Апановіча, пэрспэктыўнага інвэстыцыйнага праекту — цэху па вытворчасьці паліўных гранулаў — пэлетаў. Ён працуе на расейскім абсталяваньні. Магутнасьць вытворчасьці складзе каля 20 тысяч тон пэлетаў у год.
«Яшчэ на стадыі будаўніцтва на нас ужо выходзяць партнэры. Мы будзем выпускаць і прэміяльную, і індустрыяльную пэлету», — сказаў Юры Апановіч.
Натальля Качанава, як перадае Белта, адзначыла добрую якасьць прадукцыі нацпарку.
Прыпяцкі нацыянальны парк разьмяшчаецца ў пойме ракі Прыпяць. У 2013 годзе ён увайшоў у топ-15 тэрыторый Беларусі для біяразнастайнасьці па вэрсіі грамадзкай арганізацыі «Ахова птушак Бацькаўшчыны», як тэрыторыя пад пагрозай. Прычынай паслужылі шматлікія нараканьні на стыль прыродакарыстаньня кіраўніцтва нацпарку — у першую чаргу разьвіцьцё вясновага паляваньня і інтэнсыфікацыя высечак.
ГЛЯДЗІЦЕ ТАКСАМА: Эколягі заявілі, што вайсковыя вучэньні пашкодзяць флёры і фаўне Нацыянальнага парку «Прыпяцкі»