Намесьнік начальніка галоўнага апэратыўнага ўпраўленьня Генэральнага штабу Ўзброеных сілаў Украіны Аляксей Громаў заявіў, што расейскія вайскоўцы ўдзельнічаюць у вызначэньні баявой гатоўнасьці беларускіх войскаў.
«Дзейнасьць расейскіх і беларускіх узброеных сіл і сілавых структураў паказвае на сыстэмнае рыхтаваньне да эскаляцыі. Так, паводле наяўнай інфармацыі, афіцэры Ўзброеных сілаў Расеі бяруць удзел у ацэнцы гатоўнасьці вайсковых частак Горадзенскай, Берасьцейскай і Гомельскай абласьцей Рэспублікі Беларусь. Агулам сплянавана ацаніць гатоўнасьць заходняга рэгіёну да прывядзеньня ў баявую гатоўнасьць пад выглядам трэнаваньняў», — сказаў Аляксей Громаў 27 кастрычніка на брыфінгу ў Кіеве.
Адначасова Аляксей Громаў зьвярнуў увагу на тое, што ў Беларусі «схаваныя захады вайсковага характару — перамяшчэньне асабістага складу, узбраеньня і вайсковай тэхнікі, вайсковыя манэўры, аднаўленьне або ўладкаваньне новых аб’ектаў вайсковай інфраструктуры спалучаюцца з публічнымі сыгналамі ўлады Рэспублікі Беларусь аб адсутнасьці намераў нападаць на Ўкраіну».
«Але сталыя сустрэчы вайскова-палітычнага кіраўніцтва Беларусі з прадстаўнікамі працоўных калектываў фармуюць вобраз ворага зь неабходнасьцю правядзеньня папярэджвальных дзеяньняў супраць Украіны і NATO», — кажа намесьнік начальніка галоўнага апэратыўнага ўпраўленьня Генэральнага штабу Ўзброеных сілаў Украіны Аляксей Громаў.
ГЛЯДЗІЦЕ ТАКСАМА: «У адказ нанясем удар па вайсковых аб’ектах Беларусі». Узброеныя сілы Ўкраіны зьвярнуліся да беларускіх вайскоўцаў. ВІДЭАПаводле яго, Расея надалей перакідвае свае сілы і сродкі ня толькі ў Зябраўку, але і на іншыя аэрадромы Беларусі, а таксама вядзе актыўныя дзеяньні на беларускіх палігонах.
«Мы адсочваем усе гэтыя захады, але пакуль што непасрэднага стварэньня наступальнай групоўкі праціўніка з тэрыторыі Беларусі не заўважана, але захады мэтанакіравана праводзяцца. Пагроза ёсьць і пагрозы будуць, і мы на гэта адпаведна рэагуем. Мы ўжо павялічылі сваю групоўку на паўночным кірунку», — дадаў Громаў.
Прадстаўнік Генэральнага штабу мяркуе, што Расея можа зноў выкарыстаць беларускую тэрыторыю для новага нападу на Ўкраіну, найперш з тэрыторыі чарнобыльскай зоны, а таксама праз Чарнігаўскую вобласьць.
«Але яшчэ раз падкрэсьлю: сытуацыю адсочваем, нашу групоўку ўзмацнілі. Пакуль што ня бачым пагрозы, што праціўнік будзе непасрэдна атакаваць Кіеў. Найбольш праціўніка цікавіць разбурэньне энэргетычнай інфраструктуры і парушэньне ланцужкоў перадачы нам вайскова-тэхнічнай дапамогі», — адзначыў ён.
Гэта другая заява прадстаўніка ўкраінскага Генштабу аб росьце пагрозы з боку Беларусі. Тыдзень таму Аляксей Громаў заявіў аб пагрозе паўторнага нападу і ракетных удараў зь Беларусі.
ГЛЯДЗІЦЕ ТАКСАМА: Ва Ўкраіне заявілі аб пагрозе паўторнага нападу і ракетных удараў зь БеларусіАмэрыканскі Інстытут вывучэньня вайны (ISW) у справаздачы за 26 кастрычніка паведаміў, што сілы аб’яднанай расейска-беларускай групоўкі ў Беларусі разгортваюцца, хутчэй за ўсё, каб утрымліваць украінскія войскі на паўночным захадзе і не дазволіць ім далучыцца да контранаступальных апэрацыяў на іншых кірунках.
ГЛЯДЗІЦЕ ТАКСАМА: Выведка Вялікай Брытаніі: у Беларусі мінімальныя магчымасьці для правядзеньня складаных вайсковых апэрацыяўВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.