Гэта другі такі зварот з пачатку поўнамаштабнага расейскага ўварваньня на ўкраінскую тэрыторыю з 24 лютага. Першы раз з заклікам не выконваць імаверных загадаў свайго кіраўніцтва аб наступе на ўкраінскую тэрыторыю Ўзброеныя сілы Ўкраіны зьвярнуліся 20 ліпеня.
ГЛЯДЗІЦЕ ТАКСАМА: «Адзін крок зробіць нас ворагамі». Узброеныя сілы Ўкраіны зьвярнуліся да беларускай арміі. ВІДЭА«Ваша кіраўніцтва зьбіраецца далучыцца да расейскай узброенай агрэсіі супраць Украіны, зьбіраецца ўцягнуць беларускі народ у брудную вайну», — адзначаецца ў звароце.
Украінскія вайскоўцы падкрэсьлілі, што Ўкраіна ніколі не пагражала і цяпер не пагражае Беларусі, нягледзячы на тое, што менавіта зь беларускай тэрыторыі наносяцца ракетныя, авіяцыйныя і артылерыйскія ўдары па ўкраінскіх гарадах.
«Калі армія Беларусі падтрымае расейскую агрэсію, мы адкажам. Адкажам гэтаксама жорстка, як і ўсім акупантам на тэрыторыі Ўкраіны — з выкарыстаньнем усяго арсэналу ўзбраеньняў, з нанясеньнем удараў па вайсковых аб’ектах на тэрыторыі вашай краіны. Мы ня хочам гэтага. Мы заклікаем усіх грамадзян Беларусі не выконваць загады вашага кіраўніцтва аб уступленьні ў вайну супраць Украіны, якія зьяўляюцца злачынствам згодна з Канстытуцыяй Рэспублікі Беларусь і нормамі міжнароднага права», — адзначаецца ў звароце.
«Мы заклікаем вас не разьдзяляць адказнасьць за ваенныя злачынствы, ужо ўчыненыя расейскай арміяй ва Ўкраіне. Мы заклікаем вам не хаваць вашых сыноў, мужоў, бацькоў, братоў, загінулых за амбіцыі і страх Пуціна і Лукашэнкі страціць сваю ўладу», — заклікалі ўкраінскія вайскоўцы.
ГЛЯДЗІЦЕ ТАКСАМА: Ва Ўкраіне заявілі аб пагрозе паўторнага нападу і ракетных удараў зь Беларусі20 кастрычніка намесьнік начальніка галоўнага апэратыўнага ўпраўленьня Генэральнага штабу Ўзброеных сіл Украіны Аляксей Громаў заявіў пра рост пагрозы новага ўварваньня з тэрыторыі Беларусі ў сувязі з канцэнтрацыяй Расеяй войскаў і боепрыпасаў уздоўж украінскай мяжы.
«Узмацняецца агрэсіўная рыторыка вайскова-палітычнага кіраўніцтва Расеі і Беларусі, якая суправаджаецца разгортваньнем рэгіянальнай групоўкі войскаў так званай саюзнай дзяржавы. Пагроза аднаўленьня Ўзброенымі сіламі Расеі наступу на паўночным фронце павялічваецца. На гэты раз кірунак наступу можа быць зьменены на захад беларуска-ўкраінскай мяжы», — заявіў Аляксей Громаў.
У той жа час прэсавы сакратар камандаваньня вайскова-паветраных сіл Украіны Юры Ігнат заявіў у камэнтары Радыё Свабода, што колькасьць вайсковай авіяцыі на аэрадромах Беларусі «сталая», і «сэнсацыйнага» павелічэньня яе няма.
ГЛЯДЗІЦЕ ТАКСАМА: Сахашчык аб расейцах у Беларусі і «ціхай мабілізацыі» Лукашэнкі»: «Ствараюць групоўку для чарговага этапу агрэсіі супраць Украіны»Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.