— Спадар Аляксандар, міністар замежных спраў Макей заявіў, што ў Беларусі ідзе «контратэрарыстычная апэрацыя». КДБ потым гэтыя словы зьняпраўдзілі. Але Лукашэнка гаворыць аб «павышаным узроўні тэрарарыстычнай небясьпекі», што гэта значыць?
— Пайшоў гуляць фэйк пра нібыта запуск пляну «Перамога». Гэта і ёсьць іхная контратэрарыстычная апэрацыя. Яны зрабілі фэйкавы бот і фэйкавы тэлеграм-канал. Таксама працуе бота-фэрма, ва ўсе чаты ідзе рассылка нібыта пра запуск пляну «Перамога». Упэўнены, што несапраўдныя мабілізацыйныя прадпісаньні адпраўляюцца актывістам. Яны хочуць злавіць людзей, якія пападуцца на гэтую вуду, каб іх арыштаваць і асудзіць. Мэта — сарваць плян «Перамога».
Аляксандар Азараў
Плян «Перамога» такім чынам запускацца ня будзе. Спачатку будзе абвешчаная ступень падрыхтоўкі «Падвышаная» — гэта інфармацыя дасылаецца да кожнага беларуса. Ціханоўская і іншыя палітыкі запішуць відэа, дзе скажуць аб падвышанай ступені гатоўнасьці. І пакуль не даведаецца кожны беларус, ня будуць запускаць ступень падрыхтоўкі «Поўная».
Кожны мусіць глядзець, каб інфармацыя ішла з арыгінальнага бота, а ня фэйкавага. Яны мяняюць па адной літары ў назьве, каб было падобна, але правяраць трэба абавязкова!
Я думаю, тут задзейнічаныя ня толькі беларусы, але і расейцы. У фэйкавым канале пляну «Перамогі» 20 тысяч падпісчыкаў. У беларусаў няма ботафэрмаў, я лічу, што падключылася расейскае ФСБ.
ГЛЯДЗІЦЕ ТАКСАМА: У Беларусі «контратэрарыстычная апэрацыя» ці што? Макей, Лукашэнка, КДБ — усе кажуць рознае— Чаму зараз? Гэта праз магчымую мабілізацыю ці была для іх пагроза, што плян «Перамога» запрацуе найбліжэйшым часам?
— Была інфармацыя на нейкіх тыпу апазыцыйных расейскіх каналах, што плян «Перамога» нібыта цалкам падрыхтаваны і будзе запушчаны ў неўзабаве. Маўляў, улады рыхтуюцца. Цяпер лягічна, яны пускаюць фэйк, што плян «Перамога» запушчаны. Я ня ведаю, чаму менавіта цяпер. Проста падрыхтавалі апэрацыю, людзей, гэта робіцца цягам некалькіх месяцаў. Яны спадзяюцца, што ім будуць пісаць тысячы людзей. Яны стварылі групы затрыманьня, стварылі штаб, узгаднілі са Сьледчым камітэтам. Яны спадзяюцца, што беларусы будуць масава на іх выходзіць і рыхтуюцца ўсіх караць.
— Колькасьць затрыманых у ходзе гэтай апэрацыі можа пайсьці на сотні?
— Я ня думаю, што будуць сотні. Цяпер людзі правяраюць інфармацыю. Калі мы робім рассылку з арыгінальнага чат-бота, каб запісаныя выйшлі на сувязь, то амаль кожны пераправярае гэтую інфармацыю, піша нам на тэлеграм-канал, ці вы гэта? Мы пацьвярджаем, што так. Людзі сталі вельмі недаверлівымі, і гэта добра. Я думаю, што няшмат будзе затрыманых людзей. А дай Бог, і нікога.
— За гэтай апэрацыяй стаіць КДБ ці нейкая іншая спэцслужба?
— Я думаю, што КДБ. Лукашэнка нядаўна падпарадкаваў КДБ выключна сабе. З расейскім ФСБ можа працаваць толькі КДБ. Супрацоўнікам МУС забаронена мець кантакты з ФСБ, дазваляецца толькі праз КДБ. Гэта сумесная апэрацыя КДБ Беларусі і ФСБ Расеі. Магчыма, нават пад кіраўніцтвам ФСБ.
— Якая парада людзям у такой сытуацыі?
— Сачыць за сапраўднасьцю акаўнтаў, адкуль прыходзіць інфармацыя. І ведаць, што ў сапраўдным пляне «Перамога» ня будзе такіх заданьняў, што проста заўтра трэба нешта бегчы выконваць. Пакуль мы не данясём усім беларусам, «Поўная» ступень запускацца ня будзе.
ГЛЯДЗІЦЕ ТАКСАМА: КДБ Беларусі зьняпраўдзіла заявы Макея пра «контратэрарыстычную апэрацыю» ГЛЯДЗІЦЕ ТАКСАМА: Лукашэнка даручыў КДБ правесьці «контратэрарыстычныя мерапрыемствы»Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.