У выніку расейскай атакі 10 кастрычніка загінулі 11 грамадзян і яшчэ 87 атрымалі траўмы і раненьні. Ва ўсіх рэгіёнах, абстраляных Расеяй, пашкоджаны 70 аб'ектаў, у тым ліку 29 — крытычнай інфраструктуры, чатыры шматпавярховыя і 35 прыватных будынкаў, адна школа.
Кіеў
У Кіеве пацярпелі чатыры раёны. Загінулі пяць грамадзян, 51 атрымаў траўмы і раненьні.
- У Галасееўскім раёне ракеты пацэлілі ў ЦЭЦ-5 і склад з поліэтыленам.
- У Шаўчэнкаўскім раёне — у скрыжаваньне бульвара Шаўчэнкі і вуліцы Ўладзімірскай, дзе загарэліся аўтамабілі, якія рухаліся ў гэты час. Пашкоджаны будынак Кіеўскай філярмоніі ў выніку падрыву непадалёк пешаходнага моста каля Аркі свабоды ўкраінскага народу (раней яна называлася Арка дружбы народаў). Пашкоджаны адміністрацыйны будынак агульнаадукацыйнай школы.
- У Сьвятошынскім раёне ракета пацэліла ў тэрыторыю вайсковай часткі, а ў Дзясьнянскім раёне, найбольшым у сталіцы паводле колькасьці насельніцтва, пацярпела складзкое памяшканьне непадалёк ад ЦЭЦ-6, якая забясьпечвае ўвесь раён цяплом і электраэнэргіяй.
- Абстрэламі пашкоджаны галоўны корпус Кіеўскага нацыянальнага ўнівэрсытэту (КНУ) імя Шаўчэнкі, унівэрсытэцкая навуковая бібліятэка і Інстытут філялёгіі КНУ. Моцна пашкоджаны адміністрацыйны будынак Міністэрства адукацыі, Кіеўскі гарадзкі дом настаўніка і музэй Ханенкаў.
Нямецкае выданьне Bild паведаміла аб пашкоджаньні консульства Нямеччыны ў Кіеве. У МЗС Нямеччыны гэты факт пацьвердзілі і паведамілі, што ў момант абстрэлу там не было ніводнага супрацоўніка.
ГЛЯДЗІЦЕ ТАКСАМА: Кіеў і іншыя гарады Ўкраіны пад інтэнсіўным расейскім абстрэлам. Ёсьць ахвяры і разбурэньніКіеўская вобласьць
У Вышгарадзкім раёне расейцы абстралялі прыватны сэктар, а ў Абухаўскім раёне — Трыпольскую ЦЭС і прыватны сэктар. Паводле папярэдніх зьвестак, траўмы і раненьні атрымалі два грамадзяніны.
Ахвяры і разбурэньні: наступствы расейскага абстрэлу Кіева 10 кастрычніка. ФОТА
Дніпро і Днепрапятроўская вобласьць
У абласным цэнтры расейцы атакавалі Прыдняпроўскую ЦЭС і прадпрыемства «Євромаркет», якое займаецца вытворчасьцю будаўнічых матэрыялаў.
Ад атакі пацярпелі некалькі шматпавярховых жылых будынкаў, грамадзкі транспарт і аўтамабілі мясцовых грамадзян. Паводле папярэдніх зьвестак, чатыры жыхары загінулі і яшчэ 20 атрымалі траўмы ці раненьні.
ГЛЯДЗІЦЕ ТАКСАМА: Кіеў і іншыя гарады Ўкраіны пад інтэнсіўным расейскім абстрэлам. Ёсьць ахвяры і разбурэньніХмяльніцкая вобласьць
Непадалёк ад абласнога цэнтру, гораду Хмяльніцкага, Расея атакавала вайсковы аб’ект і пацэліла ў электрападстанцыю.
Жытомірская вобласьць
У Жытомірскай вобласьці пашкоджана электрападстанцыя. Пра ахвяры не паведамляюць.
ГЛЯДЗІЦЕ ТАКСАМА: Лукашэнка ўцягвае Беларусь у вайну. Якую ролю ў агрэсіі Масква вызначыла Беларусі?Львоў і Львоўская вобласьць
Расейскія ракеты пацэлілі ў электрападстанцыі ў Львове, Жыроўцы, Жыраве і Бераздоўцы. Пра ахвяры ўлады не паведамляюць.
Палтаўская вобласьць
У вёсцы Кіяшкі пашкоджана электрападстанцыя. Пра ахвяры не паведамляюць.
Харкаўская і Сумская вобласьці
Расейцы атакавалі найбольшую ў вобласьці электрастанцыю — Зьміёўскую ЦЭС. У паселішчы Прывакзальнае Сумскай вобласьці таксама пашкоджана электрападстанцыя.
У сувязі з пашкоджаньнем шэрагу энэргетычных аб’ектаў улады Ўкраіны заклікаюць грамадзян зьменшыць энэргаспажываньне з 17.00 да 22.00, калі адзначаецца пік спажываньня.
ГЛЯДЗІЦЕ ТАКСАМА: Зяленскі: G7 зьбярэцца на тэрміновую нараду з прычыны ўдараў па ЎкраінеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.