«Кожны дзень як мінімум двойчы — раніцай і ўвечары — я атрымліваю справаздачы вайскоўцаў. На гэтым тыдні ў справаздачах найбольшую частку займае пералік вызваленых ад ворага населеных пунктаў у рамках нашай абароннай апэрацыі. Найбольш мэдыйнай стала гісторыя вызваленьня Ліману Данецкай вобласьці, але посьпехі нашых ваяроў не абмяжоўваюцца толькі Ліманам. Гэта, ведаеце, такая тэндэнцыя», — заявіў Уладзімір Зяленскі ў вячэрнім відэазвароце.
Украінцы працягваюць наступальную апэрацыю на Херсоншчыне і Данеччыне
Уладзімір Зяленскі паведаміў, што ўкраінскія войскі вызвалілі два паселішчы ў Херсонскай вобласьці — Архангельскае і Міралюбаўка.
Кіраўнік Луганскай вайсковай абласной адміністрацыі Сяргей Гайдай раніцай 3 кастрычніка паведаміў, што ад расейскіх войскаў вызвалена вёска Торскае Данецкай вобласьці. «Гэта ўжо афіцыйна», — заявіў Сяргей Гайдай у эфіры ўкраінскага тэлеканалу «Еспресо».
Паводле вайскоўцаў, вызваленьне гэтага населенага пункту мае стратэгічнае значэньне для далейшага наступу, найперш размова пра горад Сватава ў Луганскай вобласьці, а адтуль адкрываецца шлях на Севераданецк і Лісічанск.
ГЛЯДЗІЦЕ ТАКСАМА: Беларусь трымае каля мяжы з Украінай да сямі батальённых тактычных груп, заяўляе Камандуючы аб’яднанымі сіламі УСУАдыход расейскіх войскаў падрывае мабілізацыю
Экспэрты амэрыканскага Інстытуту вывучэньня вайны (ISW) зьвярнулі ўвагу на тое, што прапагандысцкія інфармацыйныя рэсурсы пачалі крытыкаваць вайсковае камандаваньне, якое дапусьціла адыход зь Ліману ў Данецкай вобласьці і з Харкаўшчыны.
«Крамлёўскія прапагандысты ўжо не хаваюць свайго расчараваньня ў правядзеньні частковай мабілізацыі, часта абмяркоўваючы незаконную мабілізацыю некаторых мужчын і адзначаючы такія праблемы, як алькагалізм сярод новамабілізаваных. Некаторыя выступоўцы на тэлевізіі выказвалі занепакоенасьць тым, што мабілізацыя не прывядзе да стварэньня сіл, неабходных для аднаўленьня ініцыятывы на полі бою, улічваючы дрэнную якасьць расейскіх рэзэрваў», — адзначаецца ў справаздачы Інстытута.
Паводле экспэртаў ISW, расейская параза каля Ліману спарадзіла яшчэ большую блытаніну і нэгатыўныя рэпартажы, чым адыход расейцаў з Кіева, Зьмяінага вострава ці нават Харкаўшчыны.
«Уплыў Лімана, пэўна, большы, таму што цяпер расейцы баяцца быць мабілізаванымі для вырашэньня праблем на полі бою», — мяркуюць экспэрты Інстытуту вывучэньня вайны.
У выведцы Міністэрства абароны Вялікай Брытаніі мяркуюць, што незвычайна хуткае прызнаньне расейскім прэзыдэнтам Уладзімірам Пуціным праблем пры мабілізацыі падкрэсьлівае яе нефункцыянальнасьць.
«Мясцовым чыноўнікам, магчыма, незразумелыя дакладныя маштабы і прававое абгрунтаваньне кампаніі. Амаль напэўна яны набіралі кадры, якія знаходзяцца па-за дэфініцыямі, заяўленымі Пуціным і Міністэрствам абароны. У той час як прызваныя рэзэрвісты працягваюць зьбірацца ў намётавых пераходных лягерах, расейскія чыноўнікі, імаверна, зь цяжкасьцю забясьпечваюць навучаньне і знаходзяць афіцэраў для кіраўніцтва новымі падразьдзяленьнямі», — мяркуюць у выведцы Вялікай Брытаніі.
ГЛЯДЗІЦЕ ТАКСАМА: Вырасла колькасьць беларусаў, якія ў вайне спачуваюць Расеі, — новае дасьледаваньнеІнтэнсіўнасьць расейскіх абстрэлаў ня зьменшылася
У Генэральным штабе Ўзброеных сіл Украіны паведамілі, што за апошнія суткі расейскія войскі з артылерыі і авіяцыі абстралялі больш за 35 населеных пунктаў у Данецкай, Луганскай, Херсонскай, Днепрапятроўскай, Мікалаеўскай і Запароскай абласьцей.
Расейцы, як сьцьвярджаюць ва ўкраінскім Генштабе, канцэнтруюць свае абстрэлы на цывільных аб’ектах, найперш на жылых будынках.
ГЛЯДЗІЦЕ ТАКСАМА: Вэтэран батальёну «Айдар» беларусам: «Калі мы разаб’ем акупантаў ва Ўкраіне, у вас зьявіцца шанец, а мы дапаможам»Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.