Расейскія войскі канчаткова страцілі кантроль над стратэгічна важным горадам Ліман у Данецкай вобласьці, мабыць, панёсшы значныя страты — гэтая чарговая няўдача Расеі павялічыць ціск на камандаваньне расейскай арміі.
Пра гэта гаворыцца ў нядзельным аглядзе выведкі Міністэрства абароны Вялікабрытаніі.
Паводле яе ацэнак, абарону Лімана трымалі малакамплектныя падразьдзяленьні Заходняй і Цэнтральнай вайсковых акругаў Расеі, а таксама кантынгенты добраахвотна мабілізаваных рэзэрвістаў.
«Сілы, верагодна, панесьлі значныя страты, калі яны адступалі па адзінай дарозе з горада, якая ўсё яшчэ знаходзіцца ў руках расейцаў», — гаворыцца ў аглядзе.
Украінскія вайскоўцы ля Ізюма
Брытанская выведка тлумачыць, што Ліман важны ў апэратыўным пляне, бо кантроль над ім азначае кантроль над ключавой пераправай праз раку Северскі Данец, уздоўж якой Расея спрабуе ўмацаваць сваю абарону.
«Вывад Расіі з Лімана таксама зьяўляецца значнай палітычнай няўдачай (для Расеі), улічваючы, што ён знаходзіцца ў межах Данецкай вобласьці — рэгіёна, які Расія нібыта імкнулася „вызваліць“ і які яна спрабавала незаконна анэксаваць», — дадаецца ў паведамленьні.
Брытанская выведка адзначае, што вывад расейскіх войскаў з Лімана прывёў да новай хвалі публічнай крытыкі расейскага ваеннага кіраўніцтва з боку асобных афіцыйных асоб. І далейшыя страты тэрыторыі «амаль напэўна прывядуць да ўзмацненьня гэтай грамадзкай крытыкі і ўзмацненьня ціску на вышэйшую камандную структуру».
Украінскія вайскоўцы заявілі аб вызваленьні Лімана і ўзяцьці яго пад кантроль
Увечары 1 кастрычніка намесьнік кіраўніка Офіса прэзыдэнта Ўкраіны Кірыла Цімашэнка апублікаваў у тэлеграме відэа, як вайскоўцы ўсталёўваюць украінскі сьцяг на будынку адміністрацыі ў Лімане Данецкай вобласьці.
«Сёньня Ўзброеныя Сілы Ўкраіны, а менавіта 81-я асобная дэсантная брыгада сумесна з падразьдзяленьнямі Нацыянальнай гвардыі Ўкраіны батальёнам імя Кульчыцкага вызвалілі і ўзялі пад кантроль населены пункт Ліман Данецкай вобласьці», — кажа адзін з украінскіх вайскоўцаў на відэа.
На відэа бачна, як украінскія вайскоўцы скідваюць з даху адміністрацыйнага будынка расейскія сьцягі і ўсталёўваюць украінскія.
Раней прэс-сакратар Усходняй групоўкі Ўзброеных сіл Украіны Сяргей Чараваты пацьвердзіў, што Ўзброеныя сілы Ўкраіны ўвайшлі ў Ліман, аднак тады ён паведаміў, што ў горадзе працягваюцца баі. Пра баі ў гэтым горадзе казаў і кіраўнік украінскай дзяржавы Ўладзімір Зяленскі ў сваім вячэрнім звароце 1 кастрычніка.
Раней у гэты дзень кіраўнік Офісу прэзідэнта Украіны Андрэй Ярмак апублікаваў відэа, на якім украінскія вайскоўцы стаяць каля стэлы на ўездзе ў Ліман і вывешваюць украінскі сьцяг.
1 кастрычніка прэс-сакратар Усходняй групоўкі Узброеных сіл Украіны паведаміў, што расейская групоўка ў раёне Лімана трапіла ў атачэньне. Адказваючы на пытаньне аб колькасьці расейскіх вайскоўцаў у атачэньні, Чараваты назваў лічбу каля 5 тысяч, але адзначыў, што лічба можа быць і меншай.
Што кажуць у Расеі
Тым часам Мінабароны Расеі абвясьціла аб адводзе сваіх войскаў зь Лімана «ў больш выгадныя раёны» — пасьля заяваў украінскіх вайскоўцаў пра ачапленьне.
Кіраўнік Чачні Рамзан Кадыраў у сваім Telegram-канале жорстка раскрытыкаваў камандуючага войскамі Цэнтральнай ваеннай акругі генэрал-палкоўніка Аляксандра Лапіна, які кіраваў абаронай на Ліманскім напрамку. У Лімане сярод іншых атрадаў былі і «кадыраўцы».
ГЛЯДЗІЦЕ ТАКСАМА: Узброеныя сілы Ўкраіны ўвайшлі ў Ліман. Расея заявіла аб выхадзе «ў больш выгадныя раёны» ГЛЯДЗІЦЕ ТАКСАМА: «Далейшы супраціў ня мае сэнсу — вы акружаныя». Украіна: у ліманскі «кацёл» трапілі 5 тысяч расейцаўВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.