Кіраўнік Луганскай вобласьці Сяргей Гайдай заявіў, што ўкраінцы ўзялі ў «кацёл» горад Ліман. Унутры аказаліся каля 5 тысяч расейскіх вайскоўцаў. Зь ягоных словаў, расейцы зьвярнуліся да свайго кіраўніцтва з просьбай выйсьці зь Лімана, аднак атрымалі адмову.
Як мяркуе Гайдай, цяпер у расейцаў тры шляхі: паспрабаваць прарвацца з атачэньня, здацца ў палон або загінуць у «катле». Ён заявіў, што шляхі падвозу боекамплектаў або бясьпечнага доступу для расейцаў ужо перакрытыя.
Украінская служба Радыё Свабода апублікавала відэа пра тое, што адбывалася на Ліманскім накірунку 30 верасьня. Зь яго вынікае, што ўкраінскія вайскоўцы атачылі Ліман і заклікалі расейцаў здавацца ў палон.
«Вайскоўцы Расейскай Фэдэрацыі, сілы абароны Ўкраіны захапілі Ліман. Далейшы супраціў ня мае сэнсу — вы акружаныя. Каб здацца, вам неабходна выйсьці на бліжэйшую дарогу або да паселішча, скласьці зброю і дачакацца прадстаўнікоў узброеных сіл Украіны з паднятымі рукамі і здацца ў палон [...]
Памятайце, сваёй уладзе вы не патрэбныя. Для іх вы — гарматнае мяса! Вы патрэбныя сваім блізкім дома», — заклікае на відэа жаночы голас праз гукаўзмацняльнік.
Экспэрты амэрыканскага Інстытуту вывучэньня вайны (ISW) мяркуюць, што ўкраінскія вайскоўцы могуць узяць Ліман у бліжэйшыя тры дні.
Расейскія войскі пакуль утрымліваюць Ліман, аднак ужо пакінулі шэраг пазыцый. Сілы ўкраінскага войска працягваюць сьціскаць кольца вакол яго.
Расейскія крыніцы адзначаюць актыўнасьць украінскіх разьведвальных і дывэрсійных груп на шашы на паўночны ўсход ад Лімана пасьля таго, як яны, мяркуючы па ўсім, фарсавалі раку Жарабец. Некаторыя расейскія вайсковыя блогеры сьцьвярджаюць, што ўкраінскія вайскоўцы фарсавалі Северскі Данец і дзейнічаюць у лясах на поўдзень ад Крамянной.
Расейскі бок сьцьвярджае, што падцягвае да Лімана падмацаваньні з мэтай не дапусьціць поўнага атачэньня.
Аднак некаторыя вайсковыя блогеры крытыкуюць Маскву за тое, што ён так і не вывучыў урокаў ваенных дзеяньняў пад Харкавам. Яны ўказваюць на тое, што ў склад падмацаваньня ўключаныя нядаўна мабілізаваныя салдаты, якія наўрад ці адэкватна навучаныя і маюць баявы досьвед.
Іншыя блогеры кажуць, што замест рэальнай дапамогі сваім войскам у Лімане, расейскае камандаваньне аддае перавагу таму, каб абстрэльваць ракетамі Мікалаеўскую вобласьць.
Паводле зьвестак Інстытута, украінскія войскі таксама рушылі наперад у напрамку Купянска на ўсходнім беразе Аскола і працягваюць наносіць артылерыйскія ўдары па ваенных расейскіх аб’ектах у Луганскай вобласьці.
У выніку абстрэлаў HIMARS зьнішчылі радыёстанцыю і тэлевышку ў Старобыльску і асфальтавы завод у Алчэўску, дзе, паводле паведамленьняў, разьмяшчаліся расейскія войскі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
