Усе расейцы абмяркоўваюць са сваякамі праблему мабілізацыі, забесьпячэньня вайсковай тэхнікай і боепрыпасамі, маральны стан, а таксама магчымыя спосабы выйсьці з Украіны. І сваякі, і вайскоўцы выкарыстоўваюць вельмі шмат нецэнзурных слоў.
У адным з эпізодаў жонка запытвае мужа, які знаходзіцца ў Херсонскай вобласьці, што рабіць, каб выйсьці з вайны і з тэрыторыі Ўкраіны. А той адказвае ёй: «Ну, ня ведаю. Трэба раненьне атрымаць».
Расеец ахарактарызаваў свой маральны стан як апатыя і дэмаралізацыя. «Проста ўзялі ўсё, што ў мяне было ў галаве, выкінулі і наср.лі. Раней тут жарты былі, што адсюль толькі «200» або «300». А цяпер гэта ня жарты», — патлумачыў ён.
ГЛЯДЗІЦЕ ТАКСАМА: «Я бачу гэтыя спустошаныя твары». Як Грузія, Казахстан і Кіргізстан прымаюць расейскіх уцекачоў ад мабілізацыіВайсковец параіў жонцы зьяжджаць у выпадку, калі ім спыняць выплату грошай, а калі тая запытала, чаму могуць іх спыніць, ён адказаў: «Таму што хутка тут будзе паў-Расеі. Па 200 тысяч кожнаму плаціць ня змогуць, і выплачваць вялікія «бабкі» за раненьні таксама ня змогуць».
«Карацей. Хутка Херсон будзе Расеяй, празь некалькі дзён, і хто яго ведае, што з намі тут рабіць будуць. Я тут проста ў эпіцэнтры. Мы трымаем вёску, якая не дае прасунуцца далей ворагу», — адзначыў расеец.
Прэзыдэнта Расеі ён назваў нецэнзурным словам, калі даведаўся, што той абвясьціў мабілізацыю, а камандаваньне нібыта сказала, што мабілізаваныя будуць трымаць захопленыя тэрыторыі, а кантрактнікі «пойдуць далей у бой».
«Яны вас… проста як мяса адпраўляюць», — сказала жонка.
ГЛЯДЗІЦЕ ТАКСАМА: «У іх няма нават матрацаў, сьпяць на падлозе, рэчы крадуць!». Як расейцы памежных зь Беларусьсю рэгіёнаў сустрэлі мабілізацыюЯе муж дадаў, што зь дзьвюхтысячнага вайсковага расейскага фармаваньня засталося 50 чалавек. «А нас яшчэ ганьбай называюць. Тыпу, што мы лохі і самі ўсё не зрабілі, і таму мабілізацыя, гэта ўсё з-за нас, карацей. Плян які быў першапачаткова? Два дні і ўсё, а тут амаль 8 месяцаў. Тут яшчэ зіма наперадзе. Будуць яшчэ ад нас патрабаваць усякую «залупу», тыпу, ісьці ў бой па сумётах. Калі пашанцуе, то з запаленьнем лёгкіх вярнуся. І калі мне пасьля ўсяго гэтага ільготаў ніякіх не дадуць, пайду ў гэту, тую, што супраць краіны, — апазыцыю, во!», — расказаў ён жонцы. А тая прапанавала яму падумаць аб «дэзэртэрстве», за якое яго могуць зьняволіць на 10 гадоў, але гэта будзе бясьпечна.
Вайскоўцы таксама скардзяцца сваякам, што пра іх забылі, «толькі грошы адмываюць, у вачах адны даляры».
«Мільярд даляраў вытрачваюць у дзень. Не ў 150 дзён. Лепей бы дарогі новыя пабудавалі за гэтыя грошы, чым у гэтую Ўкраіну ўліваць», — сказаў расейскі вайсковец.
На заўвагу сваёй маці, што Ўкраіна — гэта рускія землі, ён сказаў: «Якія рускія? Навошта нам гэтая зямля патрэбная? Тут кожны трэці чорт табе ў сьпіну стрэліць. Як яшчэ СССР зрабілі Ўкраіну? Была зямля бамжоў, то няхай бы і заставалася зямлёй бамжоў, а то яшчэ назвалі «У-краіна». Данбас гэты… Што там? Зямля, вугаль? У нас што — вугалю мала, ці што? Навошта ён нам патрэбны?» — пераконваў расеец сваю маці.
ГЛЯДЗІЦЕ ТАКСАМА: Брытанская выведка: Расея ня зможа якасна падрыхтаваць мабілізаваных грамадзян, што можа прывесьці да яшчэ большых стратаўМаці яшчэ аднаго расейскага вайскоўца мяркуе, што ва Ўкраіне трэба забіць усіх «нацыстаў».
«Калі гэтыя нацысты трапяць да нас у Расею, то будзе таксама нам… Усіх перарэжуць. Іх трэба там усіх зьліквідаваць», — кажа маці свайму сыну-вайскоўцу.
А той адказвае: «Ты разумееш… Іх ніхто ня хоча ліквідаваць… Яны не зьбіраюцца гэта рабіць. Мы стаім, нічога ня робім, бо мы, як мінімум, нічога ня можам зрабіць, а як максымум, чамусьці нам не даюць гэтага рабіць».
ГЛЯДЗІЦЕ ТАКСАМА: У Іркуцкай вобласьці Расеі стралялі ў начальніка прызыўной камісіі. ВІДЭАЯшчэ адзін расейскі вайсковец спрабуе пераканаць сваю маці, што ва Ўкраіне ваююць украінцы, а не ЗША.
«Пры чым тут амэрыканцы? Якія найміты? Ты проста не разумееш! Тут адны хахлы ваююць, адны хахлы. Ты тут была? Каго ты слухаеш увогуле? Тут стаіць армія», — сказаў расеец. Ён таксама паведаміў сваёй маці, што ва Ўкраіне вялікая колькасьць мабілізаваных, тэхнікі і боепрыпасаў, прычым ваенныя сродкі — яшчэ з савецкіх часоў.
«Такая ж савецкая тэхніка, як у нас, старая, беспантовая... Карацей, калі б мы хацелі захапіць Украіну — яе б ужо захапілі, таму гэта нашы марудзяць, а ня хто іншы. Дзе гэтыя вялікія пуціны? Хоць бы раз запусьцілі б куды-небудзь ракеты! «Цырконы», або як называюцца – «Кінжалы». Няма? Закончыліся? Іскандэры закончыліся?» — запытвае вайсковец.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.