Маці Дзяніса Людміла Івашына расказала пра «момант, які застанецца самай яркай плямай на ўсё жыцьцё». 15 жніўня яна прыйшла да будынку абласнога суду загадзя, спадзеючыся ўбачыць сына. Неўзабаве яна здалёк заўважыла, як да бакавога ўваходу пад’ехала службовая машына, і празь нейкі час адтуль вывелі Дзяніса.
«Як бы апісаць свой стан... Я адключылася цалкам, я бачыла толькі Дзяніса. Я крычу: „Сынок, я тут!“ Ён пачуў і адказаў: „Мама, у мяне ўсё добра! Не перажывай! Мы пераможам“. Я далей крычу яму: „Трымайся, усё будзе добра!“ Гэта такая эўфарыя. Яго рэзка нахілілі ўніз, рукі за сьпіну. Я яшчэ закрычала ім: „Акуратней там!“, у мяне адключыліся ўсе рэфлексы (самазахаваньня)», — успамінае Людміла Івашына.
Гэта першы раз, калі яна здолела ўбачыць сына амаль за паўтара года. Яна хвалюецца, што той выглядаў надта бледным, але агулам амаль не зьмяніўся за час зьняволеньня.
ГЛЯДЗІЦЕ ТАКСАМА: «Ён мае аўтарытэт і сярод „палітычных“, і сярод крымінальнікаў». Як сядзіць журналіст Дзяніс Івашын, якога вінавацяць у «здрадзе дзяржаве»Калі жанчына падышла пад галоўны ўваход у будынак суду, то ўбачыла групу падтрымкі Дзяніса. Незнаёмыя людзі загаварылі зь ёй на замежнай мове. Аказалася, што гэта дыпляматы эўрапейскіх краін, якіх яна не чакала ўбачыць.
«Адна зь іх стала гаварыць на расейскай мове з акцэнтам: „Нас тут чацьвёра, але мы прадстаўляем увесь Эўразьвяз, мы сочым за кожным крокам лёсу Дзяніса. Мы вас вельмі падтрымліваем“. Гэта настолькі прыемна, гэта дае крылы», — пераказвае маці падсуднага.
Потым да іх падышлі супрацоўнікі дзяржаўнай тэлевізіі. Людміла Івашына расказала, што ў апублікаваны запіс трапіла ня ўся размова. Прыкладам, маці на пачатку размовы гучна прадставілася. На пытаньне супрацоўніцы, ці ня сорамна ёй за сына, яна адказала: «Я вельмі ганаруся сваім сынам і ганаруся, што ён не такі, як вы».
Людміла Івашына ўжо пісала скаргі на супрацоўніцу дзяржаўнай тэлевізіі Ксенію Лебедзеву, бо тая раней паказала ў сваім сюжэце кватэру Івашыных. У дакумэнтах на ператрус пазначана, што сілавікі не вялі відэаздымку. Адкуль у сюжэце ўзяліся кадры прыватнага жытла — загадка. Маці журналіста, зь ейных словаў, прыйшлі адпіскі з тэлевізіі і пракуратуры, без тлумачэньняў у адказ на ейнае пытаньне.
ГЛЯДЗІЦЕ ТАКСАМА: Маці пра Дзяніса Івашына: «Выглядаў акуратным, паголеным, нават не падалося, што схуднеў»Таксама стала вядома, што Дзяніс па-за паседжаньнем суду ў калідоры выгукнуў «Жыве Беларусь! Слава Ўкраіне!».
Калі блізкія стаялі ў калідоры суду, працэс ужо пачаўся, то пачулі гул. Аказалася, што гэта працуе «глушылка», каб ніхто ў калідоры ня мог пачуць, што гавораць на закрытым працэсе ў залі.
Хто такі Дзяніс Івашын
- Дзяніс Івашын нарадзіўся 6 чэрвеня 1979 году ў Горадні.
- Журналіст-расьсьледавальнік. Па адукацыі эканаміст і палітоляг. Жанаты.
- Працаваў журналістам у незалежнай газэце «Новы час» і рэдактарам-валянтэрам беларускай вэрсіі сайта міжнароднай супольнасьці ІnformNapalm, якая дасьледуе ўплыў расейскай агрэсіі на іншыя краіны.
- Вядомы сваімі публікацыямі пра скандальную забудову ў Курапатах, за што ён і газэта «Новы час» судзіліся з забудоўнікам, а таксама пра ўплыў «русского мира» на Беларусь і Сырыю.
- Івашына затрымалі супрацоўнікі КДБ 12 сакавіка 2021 году, калі ён выйшаў у аптэку па лекі для бабулі. Яму выставілі абвінавачаньне паводле 365 крымінальнага артыкулу («Умяшаньне ў дзейнасьць супрацоўнікаў органаў унутраных спраў»). Яму пагражае да 3 год пазбаўленьня волі.
- Сваякі і калегі мяркуюць, што затрыманьне Івашына зьвязана зь ягоным апошнім расьсьледаваньнем пра былых украінскіх бэркутаўцаў, што ўладкаваліся на працу ў беларускі АМАП. Журналіста затрымалі на наступны дзень пасьля таго, як ён даў інтэрвію пра гэта тэлеканалу «Настоящее время».
- Івашын мае ўкраінскія карані і статус замежнага ўкраінца. Пры ператрусе ў яго дома шукалі кнігі і іншыя рэчы, зьвязаныя з Украінай. МЗС Украіны адрэагавала на ягонае затрыманьне і заявіла, што журналісцкая дзейнасьць ня можа быць прычынай перасьледу.
- У траўні 2021 году ў Івашына памерла бабуля, аднак яго не пусьцілі разьвітацца зь ёй.
- Са словаў сваякоў, ліставаньне зь Дзянісам нерэгулярнае, многія лісты не даходзяць у абодва бакі.
- У чэрвені стала вядома, што ў Дзяніса ў карцэры здарыўся сардэчны прыступ. Яму выклікалі кардыёляга, рабілі кардыяграму, прызначылі лекі.
- Эўрапейская фэдэрацыя журналістаў запатрабавала вызваліць Івашына і іншых журналістаў, зьняволеных у Беларусі.