Заява аб банкруцтве была накіраваная ў суд 4 сакавіка Фэдэральнай падатковай службай. Суд уключыў у рэестр патрабаваньняў крэдытораў запазычанасьць ТАА ў выплаце падаткаў у 2021 годзе памерам каля 7 мільёнаў рублёў.
Часовым кіраўніком даўжніка зацьверджана Юлія Ага-Куліева.
ТАА «РСЭ/РС» прадстаўляе ў Расеі інтарэсы мэдыякарпарацыі Радыё Свабодная Эўропа / Радыё Свабода і было створана ў 2020 годзе згодна з патрабаваньнямі заканадаўства аб «замежных агентах».
ГЛЯДЗІЦЕ ТАКСАМА: Суд у Маскве аштрафаваў Радыё Свабода на 10 млн расейскіх рублёў. Агульная сума штрафаў перавысіла 55 млнУ 2021–2022 гадах Раскамнагляд завёў супраць ТАА і яго генэральнага дырэктара больш за тысячу адміністрацыйных спраў за адмову рэдакцый Радыё Свабода суправаджаць кожны свой журналісцкі матэрыял указаньнем пра тое, што мэдыякарпарацыя ўнесеная ў сьпіс «замежных агентаў».
Агульная сума штрафаў, накладзеных судамі ў гэтых справах, складае амаль мільярд рублёў. Тэхнічнай прычынай банкруцтва стала замарожваньне Фэдэральнай службай судовых прыставаў банкаўскіх рахункаў ТАА ў траўні 2021 году.
На думку «РСЭ/РС», расейскае заканадаўства аб «замежных агентах» зьяўляецца праявай палітычнай цэнзуры і перашкаджае журналістам у ажыцьцяўленьні іх прафэсійнай дзейнасьці. Мэдыякарпарацыя аспрэчвае дзеяньні расейскіх улад у судах унутры краіны і ў ЭСПЧ.
ГЛЯДЗІЦЕ ТАКСАМА: Радыё Свабодная Эўропа / Радыё Свабода адкрывае офісы ў Літве і Латвіі«Нягледзячы ні на што, мы працягваем даваць нашай аўдыторыі інфармацыю аб падзеях у Расеі і сьвеце, — заявіў раней прэзыдэнт РСЭ/РС Джэймі Флай. — Сытуацыя застаецца змрочнай, аднак 70-гадовая гісторыя нашай карпарацыі сьведчыць аб тым, што... час — на баку свабоды, нават у пуцінскай Расеі».
У падтрымку Радыё Свабода і свабоды слова ў Расеі неаднаразова выступалі міжнародныя журналісцкія арганізацыі, як і ўрады многіх краін.
- У сакавіку 2021 году з прычыны ўзрастаньня ціску ўладаў РСЭ/РС вымушана была пасьля 30 гадоў працы закрыць сваё бюро ў Маскве. На гэты час 27 журналістаў, якія супрацоўнічаюць з РСЭ/РС, унесеныя Міністэрствам юстыцыі Расеі ў сьпісы «замежных агентаў» — фізычных асоб. Расейскамоўныя сайты мэдыякарпарацыі — у тым ліку сайты Расейскай службы Радыё Свабода і яе акаўнты ў сацыяльных сетках — заблякаваныя на тэрыторыі Расеі.
- Нягледзячы на супрацьдзеяньне ўладаў, папулярнасьць Радыё Свабода застаецца высокай. У сакавіку 2022 году (першы месяц ваеннай агрэсіі Расеі супраць Украіны) сайты Свабоды зарэгістравалі больш за 18 мільёнаў наведваньняў, гэта найлепшы вынік у гісторыі рэдакцыі. З пачатку гэтага году сайты Радыё Свабода наведалі больш за 100 мільёнаў карыстальнікаў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.