Палітвязьні

Сяргея Ціханоўскага перавядуць з калёніі ў турму

Сяргей Ціханоўскі

11 жніўня ў судзе Кастрычніцкага раёну Магілёва разгледзелі справу аб «пераводзе ў іншую папраўчую ўстанову і зьмене ўмоваў рэжыму» Сяргея Ціханоўскага, асуджанага летась на 18 гадоў зьняволеньня.

Гаворка пра перавод у турму на 3 гады за «парушэньні». На Ціханоўскага пісалі рапарты за розныя дробязі, зрабілі яго «злосным парушальнікам», і адміністрацыя калёніі займалася тым, каб яму зьмянілі рэжым.

Справу разглядала судзьдзя Жанна Пушкіна, паведамляе праваабарончы цэнтар «Вясна» з спасылкай на інфармацыю, разьмешчаную на сайце Вярхоўнага суду.

ГЛЯДЗІЦЕ ТАКСАМА: «Думаў, што пакараньне будзе разоў у шэсьць менш суровым». Што Ціханоўскі піша пасьля прысуду

Палітзьняволенага блогера Сяргея Ціханоўскага асудзілі 14 сьнежня на 18 гадоў зьняволеньня ў калёніі ўзмоцненага рэжыму. Гэта максымальнае пакараньне, якое атрымаў апанэнт Лукашэнкі за 28 гадоў яго праўленьня.

Судзьдзя Мікалай Доля абвінаваціў Ціханоўскага па ч. 1 арт. 293 (арганізацыя масавых беспарадкаў), ч. 3 арт. 130 (распальваньне сацыяльнай варажнечы), ч. 2 арт. 191 (перашкоды працы ЦВК), ч. 1 арт. 342 КК (арганізацыя дзеяньняў, якія груба парушаюць грамадзкі парадак).

На пачатку ліпеня стала вядома, што палітвязьня этапавалі ў магілёўскую ПК № 15.

ГЛЯДЗІЦЕ ТАКСАМА: Навіны палітвязьняў: Сяргей Ціханоўскі напісаў верш аб вайне і трыццаці гадах «у нікуды», Ільля Трахтэнберг правёў 10 сутак у ШЫЗА

Затрыманьне Ціханоўскага і яго прыхільнікаў. Што трэба ведаць

  • Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
  • У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
  • Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
  • Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».

  • На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
  • Ціханоўскага трымаюць за кратамі з 29 траўня 2020 году. Яго абвінавачваюць паводле чатырох артыкулаў Крымінальнага кодэксу:

ч. 1 арт. 293 (арганізацыя масавых беспарадкаў, да 15 гадоў зьняволеньня).

ч. 3 арт. 130 (распальваньне сацыяльнай варожасьці);

ч. 2 арт. 191 (перашкода працы ЦВК). Заяву на яго падала старшыня ЦВК Лідзія Ярмошына;

ч. 1 арт. 342 (арганізацыя дзеяньняў, што груба парушаюць грамадзкі парадак).