У Анкары заяўляюць, што ў адпаведнасьці з дамоўленасьцямі аб экспарце ўкраінскай сельгаспрадукцыі, якія ў ліпені падпісалі ў Стамбуле прадстаўнікі ўладаў Украіны і Расеі, у сярэднім чакаецца адпраўка аднаго грузавога судна на дзень з украінскіх партоў.
Судна Razoni пад сьцягам Сьера-Леонэ, якое выйшла раніцай 1 жніўня з порту ў Адэсе, перавозіць больш за 26 тысяч тон кукурузы ў Лібан. Яно стала на якар ля ўваходу ў Басфор увечары ў аўторак, прабыўшы ў дарозе 36 гадзін, піша Reuters.
ГЛЯДЗІЦЕ ТАКСАМА: З порту Адэсы выйшаў першы за час вайны карабель з украінскім зернем. У чарзе яшчэ 16 сухагрузаў. ВІДЭАЧакаецца, што на наступны дзень раніцай сухагруз праінспэктуе дэлегацыя Сумеснага каардынацыйнага цэнтру ў Стамбуле, пэрсанал якога складаецца з расейцаў, украінцаў, турэцкіх супрацоўнікаў і прадстаўнікоў ААН.
Экспартнае пагадненьне аб пастаўках украінскай прадукцыі на сусьветны рынак нацэлена на тое, каб аблегчыць харчовы крызіс.
- З прычыны вайны Расеі з Украінай у заблякаваных чарнаморскіх партах сабраліся мільёны тон харчоў. Кіеў абвінавачваў у гэтым расейскі бок. Масква сьцьвярджала, што судны са збожжам і кукурузай ня могуць выйсьці з прычыны ўкраінскіх мінаў у акваторыі. ААН папярэдзіла аб рызыцы голаду — перш за ўсё ў бедных краінах Афрыкі і Азіі.