Парлямэнт Шры Лянкі прыняў адстаўку прэзыдэнта краіны Гатабаі Раджапаксы, заява аб якой была пададзена на фоне масавых пратэстаў у краіне.
Пра гэта інфармуе DW.
Пра прыняцьце адстаўкі паведаміў сьпікер парлямэнту Магінда Япа Абэйвардэна.
Паводле яго слоў, пераемнік Раджапаксы на пасадзе кіраўніка дзяржавы павінен быць абраны ў найбліжэйшы час. Парлямэнт прапануе кандыдатуры 19 ліпеня, а галасаваньне адбудзецца 20 ліпеня, цытуе сьпікера мясцовае выданьне News First.
ГЛЯДЗІЦЕ ТАКСАМА: Прэзыдэнт Шры Лянкі падаў у адстаўку дыстанцыйна з СынгапураПаводле закону, калі пасада прэзыдэнта становіцца вакантнай, на яе абіраюць аднаго з дэпутатаў. Ён будзе знаходзіцца на пасадзе на працягу тэрміну, які застаўся да чарговых выбараў, у дадзеным выпадку — да лістапада 2024 году.
Выканаўцам абавязкаў прэзыдэнта раней афіцыйна быў прызначаны прэм’ер-міністар краіны Раніл Вікрамасінгхе. Фактычна ён заняў гэтую пасаду ў сярэдзіне тыдня, пасьля таго як Гатабая Раджапакса ўцёк з краіны ў ноч на 13 ліпеня.
ГЛЯДЗІЦЕ ТАКСАМА: Прэзыдэнт Шры-Ланкі ўцёк з краіны пасьля масавых пратэстаўШры Лянка перажывае самы цяжкі эканамічны крызіс з моманту здабыцьця незалежнасьці ў 1948 годзе. У дзяржаве ўзьнік дэфіцыт харчаваньня, мэдыкамэнтаў і паліва, інфляцыя дасягнула ўзроўню 54,6 працэнта, а вонкавы доўг краіны — 51 млрд даляраў.
Палітычная сытуацыя абвастрылася пасьля таго, як пратэстоўцы 9 ліпеня ўварваліся ў палац прэзыдэнта ў найбуйнейшым горадзе краіны Калёмба і падпалілі прыватную рэзыдэнцыю прэм’ер-міністра Вікрамасінгхе.
Пасьля гэтага ўлады Шры Лянкі абвясьцілі ў краіне надзвычайнае становішча і ўвялі камэнданцкую гадзіну.